2️⃣0️⃣2️⃣0️⃣ *ജൂലൈ* 1️⃣
*ഫലം കാത്തിരിക്കുന്ന ദൈവം*
"സമയമായപ്പോള്‍ മുന്തിരിഫലങ്ങളില്‍ നിന്ന്‌ തന്‍െറ ഓഹരി ശേഖരിക്കാന്‍ അവന്‍ കൃഷിക്കാരുടെ അടുത്തേക്കു ഭൃത്യനെ അയച്ചു."
മര്‍ക്കോസ്‌ 12 : 2
പതിവുപോലെ ഉപമകൾ വഴിയാണ് ഈശോ വലിയ ദൈവീക രഹസ്യങ്ങൾ കൈമാറുന്നത്.
"ഈശോ അവരോട്‌ ഉപമകള്‍വഴി സം സാരിക്കാന്‍ തുടങ്ങി. ഒരുവന്‍ ഒരു മുന്തിരിത്തോട്ടം നട്ടുപിടിപ്പിച്ചു; അതിനുചുറ്റും വേലികെട്ടി; മുന്തിരിച്ചക്കു സ്‌ഥാപിച്ചു; ഒരു ഗോപുരവും പണിതു. അതു കൃഷിക്കാരെ ഏല്‍പിച്ചിട്ട്‌ അവന്‍ അവിടെനിന്നു പോയി."
മര്‍ക്കോസ്‌ 12 : 1
മുന്തിരിത്തോട്ടത്തിന് ഉടമസ്ഥൻ കൊടുക്കുന്ന കരുതലും കാവലുമാണ് വ്യക്തമാകുന്നത്.
ഈശോയെ രക്ഷകനായി അംഗീകരിച്ചേറ്റുപറയാൻ വിസമ്മതിച്ച യഹൂദ ജനതയാണ് മുത്തിരിത്തോട്ടം എന്നത് ലിഖിത വ്യാഖ്യാനമാണ്.
മുന്തിരിത്തോട്ടത്തിന് കൊടുക്കാവുന്ന വ്യഖ്യാന സാദ്ധ്യതകൾ ഏറെയാണ്.
പൗരോഹിത്യജീവിതം, സന്യാസ ജീവിതം, ദാമ്പത്യ ജീവിതം, അധ്യാപനം, ക്രിസ്തീയ ജീവിതം... എല്ലാം പിതാവായ ദൈവം അതീവ ജാഗ്രതയോടെ കരുതി പരിപാലിക്കുന്ന മുന്തിരിത്തോട്ടം തന്നെ. നമ്മൾ അതിന്റെ കാവൽക്കാർ മാത്രം. ഫലം പ്രതീക്ഷിച്ച് ഉടമസ്ഥൻ വരുമ്പോൾ ഫലം കണ്ടെത്താനാകും വിധം വിശ്വസ്തതയുടെ അളവ് എനിക്കില്ല എന്നതാണ് ദുഃഖസത്യം.
ഫലം പുറപ്പെടുവിക്കേണ്ട ജീവിതത്തെക്കുറിച്ചുള്ള വചന സൂചനകൾ ആണ് നാം കണ്ടെത്തുന്നത്.
1. *ദൈവം എന്റെ ജീവിതത്തിൽ നിന്നും ഫലം പ്രതീക്ഷിക്കുന്നു.*
"നല്ല മനുഷ്യന്‍ തന്‍െറ ഹൃദയത്തിലെ നല്ല നിക്‌ഷേപത്തില്‍നിന്നു നന്‍മ പുറപ്പെടുവിക്കുന്നു. ചീത്ത മനുഷ്യന്‍ തിന്‍മയില്‍ നിന്നു തിന്‍മ പുറപ്പെടുവിക്കുന്നു."
ലൂക്കാ 6 : 45
2. *കൂടുതൽ ഫലം പ്രതീക്ഷിക്കുന്ന ദൈവം ജീവിതം വെട്ടിയൊരുക്കുന്നു.*
"...എന്നാല്‍, ഫലം തരുന്നതിനെ കൂടുതല്‍ കായ്‌ക്കാനായി അവിടുന്നു വെട്ടിയൊരുക്കുകയും ചെയ്യുന്നു."
യോഹന്നാന്‍ 15 : 2 b
3. *പ്രതീക്ഷിച്ച ഫലം പുറപ്പെടുവിക്കുന്നില്ലെങ്കിൽ വെട്ടി നീക്കപ്പെടാൻ സാധ്യതയുണ്ട്.*
"എന്‍െറ ശാഖകളില്‍ ഫലം തരാത്തതിനെ അവിടുന്നു നീക്കിക്കളയുന്നു."
യോഹന്നാന്‍ 15 : 2 a
4. *ദൈവം പ്രതീക്ഷിക്കുന്ന ഫലം സത്പ്രവർത്തികൾ തന്നെ.*
"അപ്രകാരം, മനുഷ്യര്‍ നിങ്ങളുടെ സത്‌പ്രവൃത്തികള്‍ കണ്ട്‌, സ്വര്‍ഗസ്‌ഥനായ നിങ്ങളുടെ പിതാവിനെ മഹത്വപ്പെടുത്തേണ്ടതിന്‌ നിങ്ങളുടെ വെളിച്ചം അവരുടെ മുമ്പില്‍ പ്രകാശിക്കട്ടെ."
മത്തായി 5 : 16
നമ്മുടെ കർത്താവീശോമിശിഹായുടെ കൃപ നിങ്ങളോട് കൂടെ !
✍️ അഗസ്റ്റിൻ മ്ലാവറയിൽ സി. എം. ഐ.
No comments:
Post a Comment