അനുസരണം

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *ജൂൺ* 2️⃣0️⃣

 *അനുസരണം* 

"പിന്നെ ഈശോ അവരോടൊപ്പം പുറപ്പെട്ട്‌ നസറത്തില്‍ വന്ന്‌, അവര്‍ക്ക്‌ വിധേയനായി ജീവിച്ചു. അവന്‍െറ അമ്മഇക്കാര്യങ്ങളെല്ലാം ഹൃദയത്തില്‍ സംഗ്രഹിച്ചു."

ലൂക്കാ 2 : 51

ദൈവവചനത്തിന് മാംസം ധരിക്കാൻ ഇടം കൊടുത്ത പരിശുദ്ധ മറിയം ദൈവീകരഹസ്യങ്ങൾ ഹൃദയത്തിൽ കാത്തുസൂക്ഷിക്കുകയും ചെയ്തിരുന്നു... 

ദൈവീകരഹസ്യങ്ങൾ കാത്തു സൂക്ഷിച്ച ആ ഹൃദയത്തെ 'വിമലഹൃദയം' എന്ന് തിരുസഭ പേര് വിളിക്കുന്നു... 

മാതാപിതാക്കൾക്ക് വിധേയനായി ജീവിച്ച ദൈവപുത്രനായ ഈശോയുടെ അനുസരണവും അമ്മ ഹൃദയത്തിൽ സംഗ്രഹിച്ചിട്ടുണ്ട്... 

വിധേയനായി ജീവിച്ച ദൈവപുത്രന്റെ മനോഭാവങ്ങളും അമ്മ ഹൃദയത്തിൽ സംഗ്രഹിച്ചിട്ടുണ്ട് എന്ന് ന്യായമായി അനുമാനിക്കാം... 

പിതാവിന്റെ ഹിതം തേടുന്ന പുത്രന്റെ അനുസരണം അമ്മ ഹൃദയത്തിൽ സംഗ്രഹിച്ചതുകൊണ്ട് അമ്മയുടെ ഹൃദയത്തിൽ സംഗ്രഹിക്കപ്പെട്ടതും ധ്യാനവിഷയമായിരുന്നതുമായ പുത്രന്റെ അനുസരണമാണ് നമ്മുടെയും ധ്യാനം... 

മാതാപിതാക്കൾക്ക് വിധേയനായി ജീവിക്കുക എന്ന പിതാവിന്റെ ഹിതമാണ് ഈശോ അനുവർത്തിക്കുന്നത്...

ഈ ധ്യാനത്തിൽ അനുസരണം എന്നത് ദൈവഹിതം പൂർത്തിയാക്കാൻ ഒരാൾ സ്വീകരിക്കുന്ന നിലപാടുകളുടെ ആകെത്തുകയാണ് എന്ന ലളിതമായ നിർവചനം മനസ്സിൽ സൂക്ഷിക്കേണ്ടതുണ്ട് 

ഈശോയുടെ വിധേയത്വമനോഭാവത്തിന്റെ മൂന്ന് വ്യത്യസ്തമായ തലങ്ങളിലേക്ക് കടക്കാം... 

1. *പിതാവിന്റെ ഹിതം ഭക്ഷണം പോലെ ഊർജ്ജം പകരുന്നതായിരുന്നു...* 

"ഈശോ പറഞ്ഞു: എന്നെ അയച്ചവന്‍െറ ഇഷ്‌ടം പ്രവര്‍ത്തിക്കുകയും അവന്‍െറ ജോലി പൂര്‍ത്തിയാക്കുകയുമാണ്‌ എന്‍െറ ഭക്‌ഷണം."

യോഹന്നാന്‍ 4 : 34

വിശപ്പിനും മീതെ പിതാവിന്റെ ഇഷ്ടത്തെ പ്രതിഷ്ഠിക്കുന്ന ഈശോ... 

എനിക്കാകട്ടെ വിശപ്പുകൾ തീർത്തിട്ട് ദൈവഹിതം ധ്യാനിക്കാനും തിരിച്ചറിയാനും പൂർത്തിയാക്കാനും നേരം ഒട്ടുമില്ല താനും... 

ദൈവഹിതം പൂർത്തിയാകാൻ തടസം നിൽക്കുന്ന എന്നിലെ വിശപ്പുകളെ കീഴടക്കാൻ പറ്റിയിരുന്നെങ്കിൽ !

2. *ഈശോ സഹനത്തിലൂടെ അനുസരണം അഭ്യസിച്ചു...* 

"പുത്രനായിരുന്നിട്ടും, തന്‍െറ സഹനത്തിലൂടെ അവന്‍ അനുസരണം അഭ്യസിച്ചു."

ഹെബ്രായര്‍ 5 : 8

ചില ഒറ്റപ്പെടലുകളുടെയും തെറ്റിദ്ധാരണകളുടെയും സഹനവഴികൾ ദൈവഹിതം പൂർത്തിയാകാൻ കാരണം ആകുമെങ്കിൽ കുതറി മാറാതെ ആ സഹനവഴികൾ സ്വീകരിക്കുന്നതാണുത്തമം... 

3. *സ്വയം താഴ്ത്തി ഈശോ അനുസരണം അഭ്യസിച്ചു...* 

"മരണംവരെ - അതേ കുരിശുമരണം വരെ - അനുസരണമുള്ളവനായി തന്നെത്തന്നെതാഴ്‌ത്തി.ആകയാല്‍, ദൈവം അവനെ അത്യധികം ഉയര്‍ത്തി. എല്ലാ നാമങ്ങള്‍ക്കും ഉപരിയായ നാമം നല്‍കുകയും ചെയ്‌തു."

ഫിലിപ്പി 2 : 8 - 9

ചില പരിഹാസശരങ്ങൾക്കും തെറ്റിദ്ധാരണകൾക്കും കുരിശുമരണങ്ങൾക്കും മുമ്പിൽ താഴ്ന്നു കൊടുക്കുന്നത് ദൈവഹിതം പൂർത്തിയാകാൻ ഇടയാകുന്നു എങ്കിൽ അങ്ങനെയാവട്ടെ... 

എല്ലാം എവിടെയും സ്വയം തെളിയിക്കേണ്ടതില്ല എന്നർത്ഥം... 

ദൈവം ഉയർത്തുന്ന കാലത്തോളം കാത്തിരിക്കുന്ന അനുസരണമാണ് ശരിക്കും അഭിഷേകം... 

ഈശോയെ, എന്റെ എല്ലാ വിശപ്പുകൾക്കും മീതെ അവിടുത്തെ ഇഷ്ടം പ്രതിഷ്ഠിക്കാൻ എന്നെ സഹായിക്കണമേ... 

സ്വയം താഴ്ന്നു കൊടുക്കുന്നതും സഹനങ്ങളേറ്റെടുക്കുന്നതും അഭിഷേകമാണെന്ന തിരിച്ചറിവ് നൽകണമേ...

നമ്മുടെ കർത്താവീശോമിശിഹായുടെ കൃപ നിങ്ങളോട് കൂടെ !

✍️ അഗസ്റ്റിൻ മ്ലാവറയിൽ സി. എം. ഐ.