ഇടറിപ്പോകുമ്പോൾ

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *ജൂൺ* 3️⃣0️⃣

 *ഇടറിപ്പോകുമ്പോൾ* 

"ഈശോ പറഞ്ഞു: എന്നില്‍ ഇടര്‍ച്ചതോന്നാത്തവന്‍ ഭാഗ്യവാന്‍."

മത്തായി 11 : 6

'വരാനിരിക്കുന്ന മിശിഹാ നീ തന്നെയോ?' എന്ന് ഈശോയോട് ചോദിക്കാൻ പറഞ്ഞ് സ്നാപകയോഹന്നാൻ തന്റെ ശിഷ്യരെ ഈശോയുടെ പക്കലേക്ക് അയക്കുന്നു... 

സ്നാപകനാണോ ശിഷ്യർക്കാണോ ഈ സംശയം ഉണ്ടായത് എന്ന് വ്യകതമല്ല... 

സ്നാപകന്റെ സംശയം തന്റെ ശിഷ്യർ വഴി ഈശോയെ അറിയിക്കുന്നതാകാം... 

അല്ലെങ്കിൽ, ശിഷ്യരുടെ സംശയം മാറ്റാൻ അവരെ ഈശോയുടെ പക്കലേക്ക് സ്നാപകൻ പറഞ്ഞ് വിടുന്നതും ആകാം... 

അതിന്റെ വിശദാംശങ്ങളെക്കാൾ ഈശോയുടെ മറുപടി ആണ് നമ്മുടെ ധ്യാനവിചാരം... 

"ഈശോ പറഞ്ഞു: നിങ്ങള്‍ കേള്‍ക്കുന്നതും കാണുന്നതും പോയി യോഹന്നാനെ അറിയിക്കുക.

അന്‌ധന്മാര്‍ കാഴ്‌ച പ്രാപിക്കുന്നു, മുടന്തന്‍മാര്‍ നടക്കുന്നു, കുഷ്‌ഠരോഗികള്‍ ശുദ്‌ധരാക്കപ്പെടുന്നു, ബധിരര്‍ കേള്‍ക്കുന്നു, മരിച്ചവര്‍ ഉയിര്‍പ്പിക്കപ്പെടുന്നു, ദരിദ്രരോടു സുവിശേഷം പ്രസംഗിക്കപ്പെടുന്നു.

എന്നില്‍ ഇടര്‍ച്ചതോന്നാത്തവന്‍ ഭാഗ്യവാന്‍."

മത്തായി 11 : 4-6

ഈശോയുടെ ജീവിതനിയോഗവും ദൗത്യവും ഭൂമിയിൽ ദൈവരാജ്യം സ്ഥാപിക്കുക എന്നതായിരുന്നു... 

ഈശോയുടെ പ്രഥമവും പ്രധാനവുമായ ദൗത്യമായ ദൈവാരാജ്യസ്ഥാപനത്തിന്റെ സവിശേഷമായ അടയാളങ്ങൾ അഞ്ച് തലങ്ങളിൽ ഉണ്ട് എന്നത് ആർക്കും നിഷേധിക്കാനാവാത്ത ദൈവശാസ്ത്ര വ്യാഖ്യാനം ആണ്... 

1. രോഗികളെ സുഖപ്പെടുത്തി 

2. പിശാചുക്കളെ ബഹിഷ്കരിച്ചു 

3. പ്രപഞ്ചശക്തികളുടെമേൽ അധികാരം തെളിയിച്ചു 

4. മരിച്ചവരെ ഉയിർപ്പിച്ചു 

5. പാപങ്ങൾ മോചിച്ചു 

മുകളിൽ പ്രസ്താവിച്ച അഞ്ച് കാര്യങ്ങൾ ഈശോയുടെ ദൈവരാജ്യവേലയുടെ സവിശേഷമായ അടയാളങ്ങളാണ് എന്ന സത്യത്തിൽ സുവിശേഷം വായിക്കുന്ന ആർക്കും എതിരഭിപ്രായം ഉണ്ടാവില്ല.

"വരാനിരിക്കുന്ന മിശിഹാ നീ തന്നെയോ? " എന്നത് സ്നാപകന്റെ സംശയം ആണോ ശിഷ്യരുടെ സംശയം ആണോ എന്ന് വ്യക്തമല്ല. 

സംശയം ആരുടേതായാലും അല്പനേരത്തേക്ക് ഈശോയിലുള്ള വിശ്വസത്തിൽ ഉള്ള ഇടർച്ചയാണ് അത് വെളിപ്പെടുത്തുന്നത്. 

ഇടറിപ്പോകുമ്പോൾ ഈശോ പറഞ്ഞ് കൊടുക്കുന്ന ഉത്തരമാണ് ധ്യാനവിഷയം. ദൈവാരാജ്യവേലയുടെ അടയാളങ്ങളെ ധ്യാനിക്കുക എന്നതാണ് വിശ്വാസത്തിൽ ഇടറിപ്പോകുമ്പോൾ പ്രതിവിധി ആയിട്ട് ഈശോ പറഞ്ഞു തരുന്നത്. 

ഈശോയുടെ നാമത്തിൽ ജീവിതത്തിൽ കൈവരിച്ച സൗഖ്യവും പാപമോചനവും തിന്മകളുടെമേലുള്ള വിജയവും ധ്യാനിക്കുമ്പോൾ ഇടർച്ചകളെ തോൽപ്പിക്കാനാകുന്നു. 

വ്യക്തി ജീവിതത്തിലെ ദൈവരാജ്യ അടയാളങ്ങൾ ഒന്ന് എണ്ണിയെടുക്കാം. 

തിരുസഭയിൽ ഈശോ ഇന്നും തുടരുന്ന ദൈവരാജ്യവേലയുടെ കൃപയാൽ അനുഗ്രഹിക്കപ്പെട്ടില്ലായിരുന്നെങ്കിൽ ജീവിതം എത്ര ശൂന്യമാകുമായിരുന്നു എന്ന് ചിന്തിച്ചാലും മതി.

നമ്മുടെ കർത്താവീശോമിശിഹായുടെ കൃപ നിങ്ങളോട് കൂടെ !

✍️ അഗസ്റ്റിൻ മ്ലാവറയിൽ സി. എം. ഐ.