വചനവിത്ത്

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *ജൂൺ* 1️⃣8️⃣

 *വചനവിത്ത്* 

"നല്ല നിലത്തു വീണതോ, വചനം കേട്ട്‌, ഉത്‌കൃഷ്‌ടവും നിര്‍മലവുമായ ഹൃദയത്തില്‍ അതു സംഗ്രഹിച്ച്‌ ക്‌ഷമയോടെ ഫലം പുറപ്പെടുവിക്കുന്നവരാണ്‌."

ലൂക്കാ 8 : 15

വലിയ ദൈവീകരഹസ്യങ്ങളെ ലളിതമായ ഉപമകൾ വഴി കേൾവിക്കാരെ പ്രബുദ്ധരാക്കിയ നല്ല ഒരധ്യാപകനായിരുന്നു ഈശോ. ഒരേ സമയം അവൻ പ്രവാചകനും പുരോഹിതനും രാജാവുമാണ് എന്ന ദൈവശാസ്ത്രവിചിന്തനം കാര്യങ്ങൾ കൂടുതൽ വ്യക്തമാക്കും. 

പ്രവാചകധർമത്തിന്റെ സവിശേഷവും പ്രകടവുമായ അടയാളമാണ് പ്രബോധനം. 

ദൈവീകരഹസ്യങ്ങളുടെ ജ്ഞാനം ലളിതമായ ഉപമകൾ വഴി കൈ മാറുമ്പോൾ ഈശോ പ്രവാചകധർമം പൂർത്തിയാക്കുകയും ദൈവഹിതം മനുഷ്യരെ അറിയിക്കികയുമാണ്. 

ദൈവവചനത്തെ വിത്തിനോടുപമിച്ച് ഈശോ പറഞ്ഞ ഉപമയുടെ വ്യാഖ്യാനവും ഈശോ തന്നെ നൽകിയത് കൊണ്ട് ധ്യാനം എളുപ്പമുള്ളതാകുന്നു... 

വചനവിത്ത് വീഴാൻ സാധ്യതയുള്ള നാലിടങ്ങളുടെ സ്വഭാവസവിശേഷതയാണ് ഈശോ വ്യാഖ്യാനിച്ചു നൽകുന്നത്... 

പല വ്യക്തികളിൽ സംഭവിക്കുന്ന ആത്മസംഘർഷങ്ങളുടെയും ആന്തരികപ്രതിസന്ധികളുടെയും പര്യായങ്ങളായി വിത്ത് വീഴുന്ന നാലിടങ്ങൾ - വഴി, പാറ, മുൾച്ചെടികൾ, നല്ല നിലം - വ്യാഖ്യാനിച്ചു മനസിലാക്കുന്നത് ഭേദപ്പെട്ട ധ്യാനരീതി തന്നെ ആണ്... 

ഒരു വ്യക്തിയിൽ തന്നെ സംഭവിക്കാൻ സാധ്യതയുള്ള വ്യത്യസ്തങ്ങളായ ആന്തരികപ്രതിസന്ധികളുടെയും ആത്മസംഘർഷങ്ങളുടെയും വിവിധങ്ങളായ നാല് ഭാവമാറ്റങ്ങളായാണ് നാലിടങ്ങളെ - വഴി, പാറ, മുൾച്ചെടികൾ, നല്ല നിലം - നാം മനസിലാക്കാൻ ശ്രമിക്കുന്നതും പ്രാർത്ഥിച്ചു ധ്യാനിക്കാൻ സമയം കണ്ടെത്തുന്നതും.

വഴിയും പാറയും മുൾച്ചെടിയും എന്നിലെ ഇടറിപോകുന്ന ആത്മസംഘർഷങ്ങളുടെ ഇടങ്ങളാണ്... 

വഴിയും മുൾച്ചെടിയും ബാഹ്യമായ പ്രതിസന്ധികളുടെ സൂചനകളാണ്...

പിശാച് വന്ന് ഹൃദയങ്ങളിൽ നിന്ന് വചനം കൊത്തിയെടുത്തുകൊണ്ടുപോകുന്ന വഴിയാകുന്നുണ്ട് പലപ്പോഴും എന്റെ ഹൃദയം... 

ജീവിത ക്ലേശങ്ങള്‍, സമ്പത്ത്‌, സുഖഭോഗങ്ങള്‍ എന്നിവയാകുന്ന മുൾച്ചെടികൾ ഞെരുക്കി കളയുന്ന നിലവും എന്റെ ഹൃദയത്തിലെ ഞെരുക്കപ്പെടുന്നതും പിച്ചിച്ചീന്തപ്പെടുന്നതുമായ നിലക്കാത്ത ഉൾപ്പോരുകളുടെ സംഘർഷഭൂമിയാണ്...

പാറപോലുള്ള എന്റെ ഹൃദയനിലവും വചനവിത്തിന്റെ എന്നിലുള്ള വളർച്ച തടയുന്നതാണ്... 

ആംത്മീയതയുടെ വേരോട്ടം ആഴത്തിൽ അല്ലാത്തത് കൊണ്ട് വചനവിത്തിന്റെ വേരോട്ടം സാധ്യമാകാത്ത എന്റെ ബലഹീനതയുടെ പാറക്കെട്ടുകൾ... 

നിലക്കാത്ത ഉൾപ്പോരുകളോടും ആന്തരീകസംഘർഷങ്ങളോടും പടപൊരുതി വീണും എഴുന്നേറ്റും ഉള്ള എന്റെ ഈ ആത്മീയയാത്ര വചനവിത്തിന്‌ വളരാൻ അനുകൂലപരിസരം രൂപപ്പെടുത്തുന്ന സംശുദ്ധവും നിർമ്മലവുമായ ഹൃദയനിലത്തേക്കാണ്... 

ഈശോയെ, ഉത്‌കൃഷ്ടവും നിർമ്മലവുമായ ഹൃദയനിലമാക്കി എന്നെ രൂപാന്തരപ്പെടുത്തണമേ... 

ക്ഷമയോടെ കാത്തിരുന്ന് ദൈവരാജ്യത്തിന്റെ ഫലങ്ങൾ പുറപ്പെടുവിക്കുന്ന ഹൃദയനിലത്തിലേക്കുള്ള വളർച്ച എനിക്ക് നൽകണമേ...

നമ്മുടെ കർത്താവീശോമിശിഹായുടെ കൃപ നിങ്ങളോട് കൂടെ !

✍️ അഗസ്റ്റിൻ മ്ലാവറയിൽ സി. എം. ഐ.