ദൈവരാജ്യം

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *ജൂൺ* 0️⃣3️⃣

"വേറൊരുപമ ഈശോ അവരോടു പറഞ്ഞു: സ്വര്‍ഗരാജ്യം ഒരുവന്‍ വയലില്‍ പാകിയ കടുകുമണിക്കു സദൃശം....

മറ്റൊരുപമ അവന്‍ അവരോട്‌ അരുളിച്ചെയ്‌തു: മൂന്ന്‌ ഇടങ്ങഴിമാവില്‍ അതു പുളിക്കുവോളം ഒരു സ്‌ത്രീ ചേര്‍ത്ത പുളിപ്പിനു സദൃശമാണ്‌ സ്വര്‍ഗരാജ്യം."

(മത്തായി 13 : 31, 33)

ദൈവരാജ്യം 

മനുഷ്യമനസിന് എത്രയും വേഗം ഗ്രഹിക്കാൻ സാധിക്കുന്ന ലളിതമായ ഉപമകളിലൂടെയും കഥകളിലൂടെയുമാണ് ദൈവാരാജ്യത്തെക്കുറിച്ചുള്ള രഹസ്യം ഈശോ അനാവരണം ചെയ്തത്...

ജീവിച്ചിരുന്ന നാടായ പാലസ്തീനയുടെ ഭൂപ്രദേശസവിശേഷതകളോട് ചേർന്ന് പോകുന്ന കൗതുകം ജനിപ്പിക്കുന്ന ലളിതമായ ഉപമകളിലൂടെ ഈശോ സംസാരിക്കുന്നു... 

കുഞ്ഞുങ്ങളുടെ മനസ്സ് മനസിലാക്കുന്ന അധ്യാപകനെപ്പോലെ അവിടുന്ന് മുക്കുവരായ ശിഷ്യർക്ക് മനസ്സിലാക്കാവുന്ന ലളിതമായ ഭാഷയിൽ ദൈവാരാജ്യമെന്ന വലിയ രഹസ്യം വെളിപ്പെടുത്തുന്നു.... 

"വയലിൽ പാകിയ കടുകുമണി..."

ഈശോ തന്നെ വിശദീകരണവും വ്യാഖ്യാനവും നൽകുന്നു... 

വേറൊരു വിശദീകരവും വ്യാഖ്യാനവും ഈശോ നൽകുന്ന വ്യാഖ്യാനത്തോളം വരില്ലല്ലോ... 

"അത്‌ എല്ലാവിത്തിനെയുംകാള്‍ ചെറുതാണ്‌; എന്നാല്‍, വളര്‍ന്നു കഴിയുമ്പോള്‍ അതു മറ്റു ചെടികളെക്കാള്‍ വലുതായി, ആകാശപ്പറവകള്‍ വന്ന്‌ അതിന്‍െറ ശിഖരങ്ങളില്‍ ചേക്കേറാന്‍ തക്കവിധം മരമായിത്തീരുന്നു."

മത്തായി 13 : 32

വളരെ ചെറുതാണെങ്കിലും നിലത്ത് വീണഴിഞ്ഞു ഇല്ലാതായി ചെടിയായി വളർന്ന് മരമായിതീർന്ന് ആകാശപ്പറവകൾക്ക് ചേക്കേറാൻ ഇടം ഒരുക്കുന്ന ഒരു കടുകുമണി പോലെ ദൈവരാജ്യം... 

ജീവിതത്തിന്റെ കയ്പനുഭവങ്ങളിലും പാപത്തിന്റെ ചൂണ്ടക്കൊളുത്തിലും പെട്ട് തകർന്ന് അലയുന്ന ജീവിതങ്ങൾക്ക് ചേക്കേറാൻ ഒരിടമുണ്ട്...

ദൈവം രാജാവായി വാഴുന്ന ദൈവരാജ്യം...

അവതരിച്ച ദൈവവചനമായ ഈശോയുടെ തിരുഹൃദയം...

"അവിടുന്ന്‌ അവരുടെ മിഴികളില്‍നിന്നു കണ്ണീര്‍ തുടച്ചുനീക്കും. ഇനി മരണം ഉണ്ടായിരിക്കുകയില്ല. ഇനിമേല്‍ ദുഃഖമോ മുറവിളിയോ വേദനയോ ഉണ്ടാവുകയില്ല. പഴയതെല്ലാം കടന്നുപോയി."

(വെളിപാട്‌ 21 : 4)

ദുഖമോ മുറവിളിയോ ഇല്ലാതെ പരിശുദ്ധാത്മാവിന്റെ നിറവിൽ ഈശോയുടെ നെഞ്ചിൽ അഭയം കണ്ടെത്തുന്ന ജീവിതം... 

ദൈവരാജ്യജീവിത ക്രമം... 

"മൂന്ന്‌ ഇടങ്ങഴിമാവില്‍ അതു പുളിക്കുവോളം ഒരു സ്‌ത്രീ ചേര്‍ത്ത പുളിപ്പ്..."

ഫെർമെന്റഷൻ എന്ന പ്രക്രിയയുടെ ആന്തരികമാറ്റങ്ങൾ ചിന്തിക്കാനാവുമോ? 

കാഴ്ച്ചയിൽ പ്രകടമല്ലെങ്കിലും പ്രത്യക്ഷമല്ലെങ്കിലും അല്പം പുളിപ്പ് മുഴുവൻ മാവിനെയും പുളിപ്പിക്കുന്ന രാസമാറ്റം രൂപാന്തരീകരണസ്വഭാവമുള്ളതാണ്... 

വചനധ്യാനവും സ്നേഹജീവിതവും  പരിശുദ്ധാത്മനിറവും കൂദാശകളുടെ അഭിഷേകവും കൊണ്ട് പരിശുദ്ധിയുടെ പുളിപ്പിൽ സ്വയം വ്യാപാരിക്കാനും അനേകരെ സുവിശേഷ സ്നേഹം കൊണ്ട് പുളിപ്പിക്കാനും സജ്ജമാകുന്നവരുടെ ഇടം...

ദൈവരാജ്യം...

ഈശോയെ, കടുകുമണി പോലെ ഞങ്ങളുടെ ദൈവാരാജ്യസ്വപ്നങ്ങളെ വളർത്തണമേ... 

പരിശുദ്ധിയുടെ പുളിപ്പ് കൊണ്ട് ഞങ്ങളെ രൂപാന്തരപ്പെടുത്തണമേ...

✍️ അഗസ്റ്റിൻ മ്ലാവറയിൽ സി. എം. ഐ.