കരുണ

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *ജൂൺ* 2️⃣1️⃣

 *കരുണ* 

"നിങ്ങളുടെ പിതാവ്‌ കരുണയുള്ള വനായിരിക്കുന്നതുപോലെ നിങ്ങളും കരുണയുള്ളവരായിരിക്കുവിന്‍."

ലൂക്കാ 6 : 36

ദൈവത്തിന്റെ സ്വഭാവസവിശേഷതകളെ വിവരിക്കാൻ ബൈബിൾ ഉപയോഗിക്കുന്ന ഹീബ്രു പദങ്ങൾ "Hesed, Hnn, Rahamim" എന്നൊക്കെയാണ്... 

കരുണാർദ്രമായ സ്നേഹം, അനുകമ്പാർദ്രമായ സ്നേഹം എന്നൊക്കെയാണതിനർത്ഥം... 

പഴനിയമത്തിന്റെ പൊതുവായ ഒരു വിഭജനത്തിൽ പഞ്ചഗ്രന്ഥി, സങ്കീർത്തനങ്ങൾ, പ്രവാചകഗ്രന്ഥങ്ങൾ എന്നിങ്ങനെ ഒരു തരംതിരിക്കൽ നമുക്ക് അന്യമല്ല... 

അത് കൊണ്ട് തന്നെ പഞ്ചഗ്രന്ഥിയിലും സങ്കീർത്തനങ്ങളിലും പ്രവാചഗ്രന്ഥങ്ങളിലും ദൈവത്തിന്റെ സ്വഭാവസവിശേഷതയെ പരിചയപ്പെടുത്തുന്ന ഓരോ വചനം മാത്രം നമുക്ക് ധ്യാനവിചാരത്തിന് ഉപയോഗപ്പെടുത്താം... 

 *പഞ്ചഗ്രന്ഥി പരിചയപ്പെടുത്തുന്ന ദൈവം* 

"അവിടുന്ന്‌ ഇപ്രകാരം ഉദ്‌ഘോഷിച്ചുകൊണ്ട്‌ അവന്‍െറ മുന്‍പിലൂടെ കടന്നു പോയി: കര്‍ത്താവ്‌, കാരുണ്യവാനും കൃപാനിധിയുമായ ദൈവം, കോപിക്കുന്നതില്‍ വിമുഖന്‍, സ്‌നേഹത്തിലും വിശ്വസ്‌തതയിലും അത്യുദാരന്‍."

പുറപ്പാട്‌ 34 : 6

 *സങ്കീർത്തനങ്ങളിലെ ദൈവം* 

"എന്നാല്‍ കര്‍ത്താവേ, അങ്ങു കാരുണ്യവാനും കൃപാനിധിയുമായ ദൈവമാണ്‌; അങ്ങു ക്‌ഷമാശീലനും സ്‌നേഹസമ്പന്നനും വിശ്വസ്‌തനുമാണ്‌."

സങ്കീര്‍ത്തനങ്ങള്‍ 86 : 15

 *പ്രവാചകഗ്രന്ഥങ്ങൾ പരിചയപ്പെടുത്തുന്ന ദൈവം* 

"യോനാ കര്‍ത്താവിനോടു പ്രാര്‍ഥിച്ചുകൊണ്ടു പറഞ്ഞു: അവിടുന്ന്‌ ദയാലുവും കാരുണ്യവാനും ക്‌ഷമാശീലനും സ്‌നേഹനിധിയും ശിക്‌ഷിക്കുന്നതില്‍ വിമുഖനും ആണെന്നു ഞാനറിഞ്ഞിരുന്നു."

യോനാ 4 : 2

പിതാവായ ദൈവത്തിന്റെ മുഖം വെളിപ്പെടുത്തിയ ഈശോയുടെ ജീവിതവും കരുണാർദ്രമായിരുന്നു...

അപരന്റെ വേദന തിരിച്ചറിയുന്ന സംവേദനക്ഷമതയായി കരുണയെ നമുക്ക് വ്യാഖ്യാനിക്കാം... 

അപ്പോൾ ഉറപ്പിക്കാം... 

എല്ലാ ദൈവീകവെളിപാടുകളുടെയും പൂർണ്ണതയായ ഈശോയിൽ വെളിപ്പെടുത്തപ്പെട്ട ദൈവത്തിന്റെ മുഖം കരുണയുള്ള ഒരു പിതാവിന്റെ മുഖമാണ്... 

ആൻഡ്രിയ റ്റോർണിയല്ലി എന്ന ഇറ്റാലിയൻ ജേർണലിസ്റ് ഫ്രാൻസിസ് മാർപാപ്പയുമായി നടത്തിയ അഭിമുഖത്തിന്റെ പുസ്തകരൂപത്തിന്റെ പേര് "The Name of God is Mercy " എന്നാണ്... 

പറഞ്ഞ് വരുന്നത് എളുപ്പം മനസ്സിലാക്കാവുന്ന ഒരു സത്യമാണ്... 

കരുണ കാണിക്കുക എന്നത് മാത്രമാണ് ദൈവത്തിന്റെ മക്കൾ ആയി രൂപാന്തരപ്പെടുക എന്ന കുലീനമായ ധർമ്മത്തിലേക്കുള്ള ഒരേ ഒരു വഴി... 

അപ്പന്റെ സ്വഭാവസവിശേഷതകൾ ജീവിതത്തിൽ അടയാളപ്പെടുത്തുമ്പോൾ മാത്രമാണല്ലോ മക്കൾ സ്വയം തിരിച്ചറിവിലേക്ക് വളരുന്നതും മക്കൾ ആണ് എന്ന സ്വാതന്ത്ര്യത്തിലേക്ക് പ്രവേശിക്കുന്നതും... 

ദൈവത്തിന്റെ മക്കൾ എന്ന നിലനിൽപ്പിന്റെ കുലീനതയും ആനന്ദവും തീരിച്ചറിയുന്ന ആന്തരീക സ്വാതന്ത്ര്യത്തിലേക്ക് പ്രവേശിക്കാൻ പിതാവിന്റെ അടിസ്ഥാന സ്വഭാവസവിശേഷതയായ "കരുണ" സ്വന്തമാക്കേണ്ടത് അനിവാര്യമാണ് എന്നർത്ഥം... 

സ്വർഗ്ഗരാജ്യമെന്ന നിത്യസമ്മാനത്തിന് നമ്മെ അർഹരാക്കി തീർക്കുന്ന മഹനീയ കർമ്മങ്ങൾ കാരുണ്യപ്രവർത്തികൾ ആണ് എന്ന് ഈശോയുടെ വാക്കുകളിൽ നിന്ന് തന്നെ വ്യക്തമാണ്... 

"സത്യമായി ഞാന്‍ നിങ്ങളോടു പറയുന്നു, എന്‍െറ ഏറ്റവും എളിയ ഈ സഹോദരന്‍മാരില്‍ ഒരുവന്‌ നിങ്ങള്‍ ഇതു ചെയ്‌തുകൊടുത്തപ്പോള്‍ എനിക്കു തന്നെയാണു ചെയ്‌തുതന്നത്‌."

മത്തായി 25 : 40

നമ്മൾ വിശ്വസിക്കുന്ന ദൈവവും മുറിവേറ്റമനുഷ്യരും തമ്മിൽ അഭേദ്യമായ ബന്ധമുണ്ട് എന്ന തിരിച്ചറിവാണ് ക്രിസ്തീയജീവിതത്തിന്റെ ഏറ്റവും ശ്രേഷ്ഠമായ നിലനിൽപ്പിനാധാരം... 

എത്ര ലളിതമായിട്ടാണ് ഈ സത്യം വിശുദ്ധ ചാവറപിതാവ് പറഞ്ഞു തരുന്നത്, "അന്യനുപകാരം ചെയ്യാത്ത ദിനം നിന്റെ ആയുസ്സിന്റെ കണക്കുപുസ്തകത്തിൽ എണ്ണപ്പെടില്ല."

കരുണ കാണിക്കുക എന്ന ദൈവത്തിന്റെ സ്വഭാവഗുണത്തിലും സുവിശേഷജീവിതത്തിന്റെ ഏകകത്തിലും എന്റെ ജീവിതം അളക്കപ്പെടുമ്പോൾ സ്വർഗ്ഗമെന്ന നിത്യസമ്മാനത്തിനും കരുണയുള്ള ദൈവത്തിന്റെ കരുണ കാണിച്ച മക്കൾ എന്ന അഭിധാനത്തിനും നാം യോഗ്യരാകുമോ? 

നമ്മുടെ കർത്താവീശോമിശിഹായുടെ കൃപ നിങ്ങളോട് കൂടെ !

✍️ അഗസ്റ്റിൻ മ്ലാവറയിൽ സി. എം. ഐ.