കാഴ്ച

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *ജൂൺ* 0️⃣2️⃣

"മിണ്ടാതിരിക്കാന്‍ പറഞ്ഞുകൊണ്ട്‌ ജനക്കൂട്ടം അവരെ ശാസിച്ചു. അവരാകട്ടെ, കര്‍ത്താവേ, ദാവീദിന്‍െറ പുത്രാ, ഞങ്ങളില്‍ കനിയണമേ എന്ന്‌ കൂടുതല്‍ ഉച്ചത്തില്‍ നിലവിളിച്ചു പറഞ്ഞു."

(മത്തായി 20 : 31)

 *കാഴ്ച* 

കാഴ്ച നഷ്ടപ്പെട്ട രണ്ടുപേർ... 

വഴിയരികിൽ ആണ് ഇരിപ്പും കിടപ്പും... 

കാഴ്ച മങ്ങിയതിന്റെ ഇരുട്ട് മാത്രമായിരുന്നില്ല അവരെ ഭാരപ്പെടുത്തിയത്... 

പ്രകാശം അന്യമായിപ്പോയപ്പോൾ കുത്തിനോവിച്ച മനോവ്യഥയുടെയും ആത്മസംഘർഷത്തിന്റെയും ഇരുട്ടായിരുന്നു അതിഭീകരം...

വഴിയിലൂടെ ഈശോ കടന്നു പോകുന്നു എന്നറിഞ്ഞപ്പോൾ പ്രത്യാശയുടെ വെളിച്ചം ആത്മാവിൽ പതിച്ചു... 

അടഞ്ഞു പോയ കണ്ണ് തുറക്കാൻ, കളഞ്ഞു പോയ കാഴ്ച തിരികെ തരാൻ കഴിവുള്ള ദൈവപുത്രൻ നടന്നു നീങ്ങുന്ന വഴിയരികിൽ ഇരിക്കുന്നതിനും വേണം ഒരു ഭാഗ്യം !

ഈശോയുടെ പദചലങ്ങൾ കെട്ട കുരുടരുടെ ഉള്ള് കലങ്ങിയ തീരാവ്യഥ പ്രാർത്ഥനയായി പുറത്ത് വന്നു... 

"യേശു ആ വഴി കടന്നുപോകുന്നെന്നു കേട്ടപ്പോള്‍, വഴിയരികിലിരുന്ന രണ്ട്‌ അന്‌ധന്‍മാര്‍ ഉച്ചത്തില്‍ നിലവിളിച്ചു: കര്‍ത്താവേ, ദാവീദിന്‍െറ പുത്രാ, ഞങ്ങളില്‍ കനിയണമേ!"

(മത്തായി 20 : 30)

വിശ്വാസത്തോടെ നിലവിളിച്ചു പ്രാർത്ഥിക്കുന്നവരോട് "യുക്തി" യിൽ കേമന്മാർ എന്ന് സ്വയം അവകാശപ്പെടുന്ന ജനക്കൂട്ടത്തിന്റെ സ്ഥിരമുള്ള മറുപടിയാണ്, "നിശ്ശബ്ദരാവുക" എന്നത്... 

അതിവിടെയും ആവർത്തിച്ചു...

നിശ്ശബ്ദരായിരിക്കാൻ പറയുന്നവർക്ക് കണ്ണിലെ വെട്ടം നഷ്ടപ്പെട്ടവരുടെ വേദന അറിയില്ല എന്ന് മാത്രമല്ല, മങ്ങിപ്പോയ കാഴ്ച തിരികെ കൊടുക്കാനും ആവില്ല... 

എന്നിട്ടും വെറുതെ കിടന്ന് കാറുകയാണ്, "നിശ്ശബ്ദരായിരിക്കൂ" എന്ന് പറഞ്ഞ്.... 

കാറുന്ന യുക്തിവാദികൾ കാറിക്കൊണ്ടിരിക്കട്ടെ... 

നമുക്ക് വിശ്വാസത്തിന്റെ നിലവിളികൾ തുടർന്ന് കൊണ്ടിരിക്കാം... 

"മിണ്ടാതിരിക്കാന്‍ പറഞ്ഞുകൊണ്ട്‌ ജനക്കൂട്ടം അവരെ ശാസിച്ചു. അവരാകട്ടെ, കര്‍ത്താവേ, ദാവീദിന്‍െറ പുത്രാ, ഞങ്ങളില്‍ കനിയണമേ എന്ന്‌ കൂടുതല്‍ ഉച്ചത്തില്‍ നിലവിളിച്ചു പറഞ്ഞു."

(മത്തായി 20 : 31)

നടന്നു നീങ്ങുമ്പോൾ കേൾക്കുന്ന നിലവിളി ശ്രദ്ധിക്കാതെ ഈശോ ഒരിക്കലും നടപ്പ് തുടർന്നിട്ടില്ലല്ലോ... 

നടന്നു നീങ്ങുമ്പോൾ കേൾക്കുന്ന നിലവിളി ഈശോയുടെ ഉള്ളിൽ  അലിവൂറുന്ന അനുകമ്പ ജനിപ്പിക്കും... 

പതിവ് പോലെ അവൻ അവിടെ നിന്നു... അവരെ വിളിച്ചു തിരക്കി, "ഞാന്‍ നിങ്ങള്‍ക്ക്‌ എന്തുചെയ്യണമെന്നാണ്‌ നിങ്ങള്‍ ആഗ്രഹിക്കുന്നത്‌?"

(മത്തായി 20 : 32)

ഞാൻ ആഗ്രഹിക്കുന്നത് ചെയ്തു തരാൻ ആഗ്രഹിക്കുന്ന ദൈവം... 

എന്റെ ഇഷ്ടങ്ങൾ സ്വന്തം ഇഷ്ടമായി മാറ്റുന്ന ദൈവം... 

ഈശോ മിശിഹാ... 

ഉള്ളലിഞ്ഞ്‌ കണ്ണുകളിൽ തൊട്ട് കാഴ്ചയുടെ വെട്ടം തിരികെ നൽകുമ്പോൾ വിശ്വസിച്ചു നിലവിളിക്കുന്നവരെ  ഉള്ളലിഞ്ഞ്‌ തൊടുന്നവനാണ് അവൻ എന്ന് വീണ്ടും വെളിപ്പെടുത്തുകയായിരുന്നു..

ഈശോ ഉള്ളലിഞ്ഞ്‌ അവരുടെ കണ്ണുകളില്‍ സ്‌പര്‍ശിച്ചു. തത്‌ക്‌ഷണം അവര്‍ക്കു കാഴ്‌ചകിട്ടി. അവരും അവനെ അനുഗമിച്ചു.

(മത്തായി 20 : 34)

ഈശോയെ, നിശ്ശബ്ദരായിരിക്കാൻ പറയുന്ന ജനക്കൂട്ടത്തെ നിലവിളിക്കുന്ന വിശ്വാസം കൊണ്ട് ചെറുത്ത്‌ തോല്പിക്കാൻ വരം നൽകണമേ... 

✍️ അഗസ്റ്റിൻ മ്ലാവറയിൽ സി. എം. ഐ.