രക്ഷിക്കുന്ന വിശ്വാസം

ജ്ഞാനധ്യാനം

2020 ഒക്ടോബർ 18

രക്ഷിക്കുന്ന വിശ്വാസം

"ഈശോ അവളോടു പറഞ്ഞു: മകളേ, നിന്‍െറ വിശ്വാസം നിന്നെ രക്‌ഷിച്ചിരിക്കുന്നു. സമാധാനത്തോടെ പോവുക."

ലൂക്കാ 8 : 48

പ്രതിസന്ധികളുടെ നീർച്ചുഴിയിൽ വലയുന്നവർക്ക് ഈശോ ഉത്തരമാകുന്നതിന്റെ സുവിശേഷ സാക്ഷ്യമാണ് ജ്ഞാനധ്യാനം...

നീണ്ട പന്ത്രണ്ട് വർഷങ്ങൾ രക്തസ്രാവത്തിന്റെ പിടിയിൽ കഴിഞ്ഞ് കൂടി മാനസികമായും ശരീരികമായും നൊമ്പരങ്ങൾ ഏറ്റുവാങ്ങാൻ വിധിക്കപ്പെട്ട ഒരു സ്ത്രീ...

ഉണ്ടായിരുന്ന സാമ്പാദ്യം മുഴുവൻ വൈദ്യന്മാർക്ക് കൊടുത്ത് ചികത്സ തേടിയവൾ...

സമ്പദ്യം തീർന്നു എന്നതല്ലാതെ രോഗത്തിൽ ഒട്ടുമേ കുറവുണ്ടായില്ല...

രക്തസ്രാവക്കാരി സമൂഹത്തിൽ നിന്ന് അകന്ന് ജീവിക്കേണ്ടവളാണ് എന്ന നിർബന്ധമുണ്ടായിരുന്ന  യഹൂദമതാത്മകതയുടെ കാർക്കശ്യ നിലപാടുകൾ കൂടി മനസ്സിലാകുമ്പോൾ ആ സ്ത്രീ കടന്നു പോകുന്ന ആത്മഭാരം ഊഹിക്കാനാകും...

ആർക്കും ഉത്തരം നൽകാനാകാത്ത ജീവിത പ്രതിസന്ധിയിൽ അവൾക്ക് ഈശോയേ ഓർമ്മ വന്നു...

തിക്കും തിരക്കുമുള്ള ജനക്കൂട്ടത്തിനിടയിൽ നടന്ന് നീങ്ങുന്ന ഈശോയുടെ വസ്ത്രാഞ്ചലത്തിൽ അവൾ തൊട്ടു...

ഈശോയുടെ സാമിപ്യത്തിൽ ജീവിതപ്രതിസന്ധികൾ ശൂന്യമാകുകയോ അപ്രത്യക്ഷമാകുകയോ ചെയ്യുന്നതിന്റെ കാഴ്ചയാണിത്...

ഈശോയുടെ പ്രതികരണം എത്ര ഭംഗിയുള്ളതാണ്!

"മകളേ, നിന്‍െറ വിശ്വാസം നിന്നെ രക്‌ഷിച്ചിരിക്കുന്നു. സമാധാനത്തോടെ പോവുക."

വിശ്വാസം എന്ന ദാനം കൊണ്ട് ഈശോയോട് ഒട്ടിനിൽക്കുമ്പോൾ പ്രതിസന്ധികളുടെ മീതെ  നടന്ന് നീങ്ങാനുള്ള കൃപ ലഭിക്കുന്നു...

✍️ അഗസ്റ്റിൻ മ്ലാവറയിൽ സി. എം. ഐ.