വാക്ക്

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *ജൂലൈ* 6️⃣

 *വാക്ക്* 

"നിന്‍െറ വാക്കുകളാല്‍ നീ നീതീകരിക്കപ്പെടും; നിന്‍െറ വാക്കുകളാല്‍ നീ കുറ്റം വിധിക്കപ്പെടുകയും ചെയ്യും."

മത്തായി 12 : 37

ഹൃദയത്തിന്റെ പ്രതിഫലനമാണ് വാക്ക്. 

വാക്ക് ഹൃദയത്തെ വെളിപ്പെടുത്തുന്നു എന്നും പറയാം. ജീവിതവൃക്ഷത്തിന്റെ ഫലം പ്രകടമായി അടയാളപ്പെടുത്തുന്നവയാണ് പറയുന്ന വാക്കുകൾ.

നന്മയുടെയും കൃപയുടെയും ഭണ്‍ഡാരം ഉള്ളിൽ സൂക്ഷിക്കുന്നവർക്കേ നല്ല വാക്കുകൾ പറയാനാകൂ. 

വില കെട്ട വാക്കുകൾ ഉപയോഗിക്കുന്നവരെ തിന്മയുടെ ഭണ്‍ഡാരത്തില്‍ നിന്നും തിന്മ പുറപ്പെടുവിക്കുന്ന ദുഷ്ടൻ എന്നാണ് ഈശോ വിളിക്കുന്നത്. 

പൊതുവെ പറയുന്നത് പ്രവർത്തികൾ വിധിക്കപ്പെടും എന്നാണല്ലോ. 

ഈശോ ആ കാഴ്ചപ്പാട് തിരുത്തി എഴുതുന്നു. 

പറയുന്ന ഓരോ വ്യർത്ഥ വാക്കിനും കണക്ക് കൊടുക്കേണ്ടി വരുമത്രെ. 

ഒരാൾ കുറ്റം വിധിക്കപ്പെടുമ്പോളും നീതീകരിക്കപ്പെടുമ്പോളും അതിന്റെ ഏകകമായി മാറുന്നത് അയാൾ പറഞ്ഞ വാക്കുകൾ ആയിരിക്കും എന്നത് ഉള്ളിൽ തറയ്ക്കേണ്ട യാഥാർഥ്യമാണ്. 

എത്രയോ വാക്കുകൾ ജീവിതത്തിൽ ഉപയോഗിച്ചിട്ടുണ്ടാവും. 

ഒരു കണക്കെടുപ്പിന് മുതിരുമ്പോൾ സ്വയം ലജ്ജിതനാകുന്നു. 

വില കേട്ടതും വ്യർത്ഥമായതുമായ വാക്കുകൾ എത്രയോ പ്രാവശ്യം സംഭാഷണത്തിന്റെ ഭാഗമായിരിക്കുന്നു. 

പരിഹാസവാക്കുകൾ, അപവാദവാക്കുകൾ, കുത്തുവാക്കുകൾ, മേൽക്കോയ്‌മയുടെ വാക്കുകൾ, മുറിപ്പെടുത്തുന്ന വാക്കുകൾ... എന്നിങ്ങനെ വ്യർത്ഥമായ സംഭാഷണ രീതിയിൽ നിന്നും മോചനം ആത്മീയ വളർച്ചയിൽ അനിവാര്യമാണ് എന്ന് സ്വയം തിരിച്ചറിയുന്നു. 

വാക്കുകളെ 

വിശുദ്ധീകരിക്കുന്നവരുടെ സാധ്യത കൂടി മനസ്സിൽ കുറിച്ചിടാം. 

"കര്‍ത്താവ്‌ അരുളിച്ചെയ്യുന്നു: വിലകെട്ടവ പറയാതെ സദ്‌വചനങ്ങള്‍ മാത്രം സംസാരിച്ചാല്‍ നീ എന്‍െറ നാവുപോലെയാകും."

ജറെമിയാ 15 : 19 b

ഈശോയെ, എന്റെ ഹൃദയത്തെ നന്മയുടെ ഭണ്‍ഡാരമാക്കി രൂപാന്തരപ്പെടുത്തണമേ. 

നന്മയുടെ ഭണ്‍ഡാരത്തില്‍ നിന്നും മറ്റുള്ളവരെ പടുത്തുയർത്തുകയും വേദനിക്കുന്നവരുടെ മുറിവുണക്കുകയും ചെയ്യുന്ന കൃപ നിറഞ്ഞ വാക്കുകൾ എനിക്ക് പുറപ്പെടുവിക്കാനാകട്ടെ !

✍️ അഗസ്റ്റിൻ മ്ലാവറയിൽ സി. എം. ഐ.