2020 ഡിസംബർ 10
മറിയത്തിന്റെ അഭിവാദനം
"മറിയത്തിന്റെ അഭിവാദനം കേട്ടപ്പോള്‍ എലിസബത്തിന്റെ ഉദരത്തില്‍ ശിശു കുതിച്ചു ചാടി. എലിസബത്ത് പരിശുദ്‌ധാത്‌മാവു നിറഞ്ഞവളായി."
ലൂക്കാ 1 : 41
രണ്ട് ഗർഭവതികളുടെ കൂടിക്കാഴ്ചയാണ് ഇന്നത്തെ ജ്ഞാനധ്യാനത്തിനാധാരം...
രക്ഷകന്റെ അമ്മയായ മറിയവും രക്ഷകന് വഴിയൊരുക്കിയ സ്നാപകന്റെ അമ്മയായ എലിസബത്തും കണ്ടുമുട്ടുന്നു...
ഇളയമ്മയായ എലിസബത്തിനെ ശുശ്രൂഷിക്കാൻ ദീർഘദൂരം നടന്ന് മറിയം എത്തുന്നു...
ദൈവദൂതന്റെ അരുളപ്പാടും അത്യുന്നതശക്തിയുടെ ആവാസവും സ്വീകരിച്ച മറിയത്തിന് എലിസബത്തിന്റെ വീട്ടിലേയ്ക്കുള്ള ദീർഘ ദൂര യാത്ര ഒരു ഭാരമായിരുന്നില്ല...
ദൈവാനുഭവം ശുശ്രൂഷയിലേയ്ക്ക് ഒരാളെ നയിക്കുന്നു എന്നതിന്റെ സുവിശേഷ ഭഷ്യമാണിത്...
സഹായം എത്തിക്കാനും ശുശ്രൂഷ ചെയ്യാനും പ്രേരിപ്പക്കാത്ത പ്രാർത്ഥനകളും ധ്യാനങ്ങളും സത്യസന്ധമാണോ എന്ന് സംശയിക്കണം...
ശുശ്രൂഷിക്കാനായി എത്തിയ മറിയത്തിന്റെ അഭിവാദനം കേട്ട മാത്രയിൽ എലിസബത്ത് പരിശുദ്‌ധാത്‌മാവിൽ നിറഞ്ഞു...
മറിയം സന്ദർശനത്തിനെത്തുന്ന ജീവിതങ്ങളിൽ
പരിശുദ്‌ധാത്‌മാവ് നിറയും എന്നതിന്റെ ഉത്തമസാക്ഷ്യം...
അമ്മേ, മറിയമേ... അമ്മ ഞങ്ങളെയും സന്ദർശിക്കണേ...
ഞങ്ങളും പരിശുദ്‌ധാത്‌മാവിൽ നിറയട്ടെ...
✍️ അഗസ്റ്റിൻ മ്ലാവറയിൽ സി. എം. ഐ.
No comments:
Post a Comment