പ്രതിഫലം

🥭 *ജ്ഞാനധ്യാനം* 🥭

 *2️⃣0️⃣2️⃣0️⃣ജൂലൈ1️⃣7️⃣* 

 *പ്രതിഫലം* 

"പ്രവാചകനെ പ്രവാചകനായി സ്വീകരിക്കുന്നവന്‌ പ്രവാചകന്‍െറ പ്രതിഫലവും നീതിമാനെ നീതിമാനായി സ്വീകരിക്കുന്നവന്‌ നീതിമാന്‍െറ പ്രതിഫലവും ലഭിക്കുന്നു."

മത്തായി 10 : 41

കണക്കുകൂട്ടലുകൾ തെറ്റിക്കുകയാണ് ഈശോ. നമ്മുടെ ബുദ്ധിയിൽ ചിട്ടപ്പെടുത്തുകയും നിശ്ചയിക്കപ്പെടുകയും ചെയ്യുന്ന കണക്കുകൾ സുവിശേഷങ്ങളിൽ പലയിടങ്ങളിൽ മാറ്റിയെഴുതപ്പെടുന്നുണ്ട്. 

99 നെ വിട്ടിട്ട് ഒന്നിനെ അന്വേഷിച്ചിറങ്ങുക... 

ആദ്യം വന്നവനും അവസാനം വന്നവനും ഒരേ കൂലി കൊടുക്കുക... 

കുരിശിൽ കിടന്ന് അവസാനനിമിഷം അനുതപിച്ച നല്ല കള്ളന് പറുദീസാ വാഗ്ദാനം ചെയ്യുക... 

നമ്മുടെ ബുദ്ധിയിൽ ചിട്ടപ്പെടുത്തിയ ഒരു ഏകകം കൊണ്ടും ഇതിന്റെ യുക്തി മനസിലാക്കാനാവില്ല... 

ഫ്രാൻസിസ് മാർപാപ്പ ഇടക്കൊക്കെ ഉപയോഗിക്കാറുള്ള ഒരു പദപ്രയോഗം കൊണ്ട് അത് കുറച്ചൊക്കെ മനസിലാകും... 

അജപാലനത്തിൽ പുലർത്തേണ്ട കരുണയെക്കുറിച്ച് പറയുമ്പോളാണ് അദ്ദേഹം അത് പരാമർശിക്കുന്നത്... 

The Logic of Mercy !

കാരുണ്യത്തിന്റെ യുക്തി... 

ഈശോയുടെ മനസ്സാണത്... 

സമാനമായ അന്തരാർത്ഥം ഉൾകൊള്ളുന്ന വചനവിചാരമാണ് ഇന്ന്.

"പ്രവാചകനെ പ്രവാചകനായി സ്വീകരിക്കുന്നവന്‌ പ്രവാചകന്‍െറ പ്രതിഫലവും നീതിമാനെ നീതിമാനായി സ്വീകരിക്കുന്നവന്‌ നീതിമാന്‍െറ പ്രതിഫലവും ലഭിക്കുന്നു."

പ്രവാചകനും പ്രവാചകനെ ഹൃദയപൂർവ്വം സ്വീകരിക്കുന്നവനും നീതിമാനും നീതിമാനെ സ്നേഹപൂർവ്വം സ്വീകരിക്കുന്നവനും ഒരേ പ്രതിഫലം ലഭിക്കും എന്നാണ് സുവിശേഷഭാഷ്യം.

ബൈബിൾ വിജ്ഞാനീയത്തിന്റെ ഭാഷയിൽ ആരാണ് പ്രവാചകൻ? 

ആരാണ് നീതിമാൻ? 

ദൈവഹിതം മുഖം നോട്ടമില്ലാതെ ദൈവജനത്തിനു മുമ്പിൽ വെളിപ്പെടുത്തുന്നവനാണ് പ്രവാചകൻ. 

ദൈവമനുഷ്യബന്ധങ്ങൾ വിള്ളലില്ലാതെ പരിപാലിക്കുന്നവനാണ് നീതിമാൻ. 

പ്രവാചകനെ പ്രവാചകനായി സ്വീകരിക്കുക എന്നതിനർത്ഥം പ്രവാചകൻ വെളിപ്പെടുത്തി നൽകുന്ന ദൈവഹിതം സ്വീകരിക്കുക എന്നാണ്. 

നീതിമാനെ നീതിമാനായി സ്വീകരിക്കുക എന്നതിനർത്ഥം നീതിമാന്റെ നീതിബോധം സ്വന്തമാക്കുക എന്നാണ്. 

അങ്ങനെ സ്വീകരിക്കുന്നവർക്ക് ലഭിക്കുന്ന പ്രതിഫലം പ്രവാചകനും നീതിമാനും വേണ്ടി ദൈവം കരുതി വച്ചിരിക്കുന്ന പ്രതിഫലം തന്നെയാണ്.

✍️ അഗസ്റ്റിൻ മ്ലാവറയിൽ സി. എം. ഐ.

ശുശ്രൂഷ

🥭 *ജ്ഞാനധ്യാനം* 🥭

 *2️⃣0️⃣2️⃣0️⃣ജൂലൈ1️⃣6️⃣* 

 *ശുശ്രൂഷ* 

"ശുശ്രൂഷിക്കപ്പെടാനല്ല, ശുശ്രൂഷിക്കാനും അനേകരുടെ മോചനദ്രവ്യമായി സ്വജീവന്‍ കൊടുക്കാനും മനുഷ്യപുത്രന്‍ വന്നിരിക്കുന്നതുപോലെ തന്നെ."

മത്തായി 20 : 28

സബദീപുത്രന്മാരായ യാക്കോബും യോഹന്നാനും ഈശോയുടെ രാജ്യത്തിൽ അവിടുത്തെ ഇടത്തും വലത്തും ഇരിക്കാനുള്ള വരം അമ്മയെക്കൊണ്ട് ഈശോയോട് ചോദിപ്പിക്കുന്നു. റോമാക്കാരുടെ ആധിപത്യത്തിൽ നിന്നും യഹൂദരെ മോചിപ്പിക്കുന്ന രാഷ്ട്രീയ വിമോചകനായി (Political Liberator ) വരാനിരുന്ന മിശിഹായെ കണ്ടിരുന്ന യഹൂദരുടെ പൊതുവായ കാഴ്ചപ്പാടിന്റെ സ്വാധീനത്തിൽ പെട്ടാണ് യാക്കോബും യോഹന്നാനും ഈ ചോദ്യം അമ്മയെക്കൊണ്ട് ഉന്നയിക്കുന്നത് എന്ന് തീർച്ചയാണ്. 

ഈശോ പറയുന്ന മറുപടിയിലെ ഒരു വാക്യമാണ് നമ്മുടെ ജ്ഞാനധ്യാനത്തിനാധാരം. 

"ശുശ്രൂഷിക്കപ്പെടാനല്ല, ശുശ്രൂഷിക്കാനും അനേകരുടെ മോചനദ്രവ്യമായി സ്വജീവന്‍ കൊടുക്കാനുമാണ് മനുഷ്യപുത്രന്‍ വന്നിരിക്കുന്നത്" എന്ന വാക്യം അവിടുത്തെ ജീവിതനിയോഗം വ്യക്തമാക്കുന്നതാണ്. പൗരോഹിത്യ പരിശീലനത്തിൽ പഠനവിഷയമായിരുന്ന 'പൗരോഹിത്യത്തിന്റെ ദൈവശാസ്ത്രം' എന്ന പാഠ്യഭാഗത്തിന്റെ കേന്ദ്രബിന്ദുവായിരുന്ന വചനം ഈ വചനമായിരുന്നു. ഈശോയെ അനുഗമിക്കുന്ന എല്ലാവരുടെയും വിശിഷ്യാ ഈശോയുടെ ശുശ്രൂഷാപൗരോഹിത്യത്തിൽ പങ്കുചേരുന്ന പുരോഹിതരുടെയും സമർപ്പിതജീവിതം തെരെഞ്ഞെടുത്തിരിക്കുന്നവരുടെയും ജീവിത നിയോഗം വെളിവാക്കുന്ന വചനമാണത്. 

ശുശ്രൂഷയാണ് നമ്മുടെ ദൗത്യം. 

കർമ്മല മാതാവിന്റെ പെരുന്നാൾ കൂടി പ്രാർത്ഥനയോടെ നാം ആഘോഷിക്കുന്നു. 

നിത്യപുരോഹിതനായ ഈശോയുടെ അമ്മയും ആദ്യത്തെ ശിഷ്യയുമായ അമ്മയോളം ശുശ്രൂഷാജീവിതത്തിന്റെ ആഴം പറഞ്ഞു തരുന്ന ആരുമുണ്ടാവില്ല. എത്ര ഭംഗിയായിട്ടാണ് അമ്മയുടെ ശുശ്രൂഷാജീവിതത്തെ ലൂക്കാ സുവിശേഷകൻ വിവരിക്കുന്നത്. "ആദിവസങ്ങളില്‍, മറിയംയൂദയായിലെ മലമ്പ്രദേശത്തുള്ള ഒരു പട്ടണത്തിലേക്കു തിടുക്കത്തില്‍ യാത്രപുറപ്പെട്ടു."

(ലൂക്കാ 1 : 39)

ഈശോ ഉള്ളിലുള്ളവർക്ക് വേദനിക്കുന്നവരിലേക്ക് എത്തി ശുശ്രൂഷയുടെ കരങ്ങൾ നീട്ടാതിരിക്കാനാവില്ല എന്ന് അമ്മ പഠിപ്പിക്കുന്നു. 

ഏലിയാ പ്രവാചകന്റെ കാലം മുതൽ കാർമ്മൽ മലയിൽ തപസ്സിലും പ്രാർത്ഥനയിലും കഴിഞ്ഞിരുന്ന താപസ്സരുടെ മാതൃകയിൽ 12 -ാം നൂറ്റാണ്ടിലാണ് നൈയാമികമായ ഘടനയോട് കൂടിയ ഒരു കർമ്മലീത്ത സന്യാസ സഭ ആരംഭിക്കുന്നത്. പരിശുദ്ധ അമ്മയോടുള്ള പ്രത്യേകഭക്തിയും ധ്യാനാത്മകജീവിതവുമായിരുന്നു അവരുടെ സവിശേഷതകൾ. പ്രതിസന്ധികളുടെ നടുവിൽ കർമ്മലീത്താസഭയുടെ ആറാം പ്രിയോർ ജനറൽ ആയിരുന്ന വിശുദ്ധ സൈമൺ സ്റ്റോക്ക് കരഞ്ഞ് പ്രാർത്ഥിച്ചപ്പോൾ മാതൃവാത്സല്യമായി കർമ്മലീത്തരുടെ കൂടെ എന്നും താൻ കൂടെയുണ്ടാവും എന്ന ഉറപ്പും സംരക്ഷകവചമായി ഉത്തരീയവും 1251 ജൂലൈ 16 ന് കൊടുത്തു എന്നാണ് ചരിത്രം. അമ്മ നൽകിയ വാഗ്ദാനം ഇതാണ്, 

"ഇത് നിനക്കും കര്‍മ്മലീത്താക്കാര്‍ക്കും നല്‍കപ്പെടുന്ന വിശേഷ അനുഗ്രഹമാണ്. ഇത് ധരിച്ചുകൊണ്ട് മരിക്കുന്ന ഒരുവനും നിത്യമായ അഗ്നിയില്‍ സഹനമനുഭവിക്കേണ്ടതായി വരികയില്ല.”

ഉത്തരീയത്തിന്റെ സംരക്ഷണം നമ്മുടെ അവകാശമാണെന്ന് തിരിച്ചറിയാനും ഈശോയ്ക്ക് ജീവിതത്തെ പുനരർപ്പിക്കുവാനും നരകശിക്ഷയിൽ രക്ഷ നേടുവാനും ശുശ്രൂഷാജീവിതം വഴി ഈശോയെ മഹത്വപ്പെടുത്താനും കർമ്മല മാതാവ് നമ്മുക്ക് വേണ്ടി പ്രാർത്ഥിക്കട്ടെ. 

കർമ്മല മാതാവിന്റെ തിരുന്നാൾ മംഗളങ്ങൾ !

✍️ അഗസ്റ്റിൻ മ്ലാവറയിൽ സി. എം. ഐ.

യോനായുടെ അടയാളം

🥭 *ജ്ഞാനധ്യാനം* 🥭

 *2️⃣0️⃣2️⃣0️⃣ജൂലൈ1️⃣3️⃣* 

 *യോനായുടെ അടയാളം* 

"നിനെവേനിവാസികള്‍ വിധിദിവസം ഈ തലമുറയോടൊത്ത്‌ എഴുന്നേറ്റ്‌ ഇതിനെ കുറ്റം വിധിക്കും. എന്തെന്നാല്‍, യോനായുടെ പ്രസംഗം കേട്ട്‌ അവര്‍ അനുതപിച്ചു. ഇതാ, ഇവിടെ യോനായെക്കാള്‍ വലിയവന്‍!"

മത്തായി 12 : 41

നിയമജ്ഞരും ഫരിസേയരും പതിവ് സ്വഭാവം തുടരുകയാണ്. അവർക്ക് ഈശോയെ വാക്കിൽ കുടുക്കുകയോ അവിടുന്നിൽ കുറ്റം കണ്ടെത്തുകയോ വേണം. അതിനായി അടയാളം കാണണം എന്ന ആഗ്രഹം ഉന്നയിച്ചു കൊണ്ട് അവർ ഈശോയുടെ പിന്നാലെ കൂടി. 

"ദുഷിച്ചതും അവിശ്വസ്‌തവുമായ തലമുറ അടയാളം അന്വേഷിക്കുന്നു എന്നാണ് ഈശോയുടെ പ്രതികരണത്തിന്റെ ആദ്യ ഭാഗം. 

സ്വന്തം സ്വാർത്ഥത നിറഞ്ഞ താല്പര്യങ്ങൾ പൂരിപ്പിക്കാൻ ദൈവത്തെ സ്വന്തം ഇഷ്ടങ്ങളുടെ ചട്ടക്കൂടിൽ ഒതുക്കാമെന്ന വ്യാമോഹം ഉള്ളിൽ കൊണ്ടുനടന്നവരെ "ദുഷിച്ചതും അവിശ്വസ്തവും" എന്നല്ലാതെ മറ്റെന്തു വിളിക്കാൻ? 

അടയാളം കാണാൻ ആഗ്രഹം തോന്നിയാൽ ഉടനെ ആ ആഗ്രഹം പൂർത്തീകരിച്ചു കൊടുക്കുന്ന ഒരു കൺകെട്ടുകാരനായി ഈശോ മിശിഹായെ കാണാൻ മാത്രം ദുഷിച്ചു പോയിരുന്നു അവർ. സ്വന്തം ആഗ്രഹങ്ങളുടെയും കൗതുകങ്ങളുടെയും പൂർത്തിക്കായി ഈശോയുടെ നാമത്തിൽ അടയാളങ്ങളാവശ്യപ്പെടുന്നവർ ഇന്നും കേൾക്കേണ്ട മറുപടി ഇത് തന്നെ ആയിരിക്കും. 

സാമാന്യം കാർക്കശ്യം നിറഞ്ഞ ഭാഷയിൽ തിരുത്തൽ കൊടുക്കുക മാത്രമല്ല അവിടുന്ന് ചെയ്തത്. 

എല്ലാ കാലങ്ങൾക്കും വേണ്ടി നൽകപ്പെട്ട അടയാളം ഒരിക്കൽ കൂടി അവിടുന്ന് വ്യക്തമാക്കി. 

യോനാ പ്രവാചകന്റെ അടയാളമാണ് ഒരേയൊരടയാളം എന്ന് ഈശോ ആവർത്തിക്കുന്നു. അനുതപിക്കുക്കയും പശ്ചാത്തപിക്കുകയും ചെയ്യുന്ന വ്യക്തികളോടും കുടുംബത്തോടും ദേശത്തോടും വിശ്വാസസമൂഹത്തോടും ദൈവം കരുണ കാണിക്കും എന്നതിന്റെ നിലനിൽക്കുന്ന അടയാളമാണ് യോനാ പ്രവാചകൻ. 

മനസാന്തരത്തിന്റെയും അനുതാപത്തിന്റെയും ദൈവകരുണയുടെയും അടയാളമാണ് യോനാ. "സമയം പൂര്‍ത്തിയായി, ദൈവരാജ്യം സമീപിച്ചിരിക്കുന്നു. അനുത പിച്ച്‌ സുവിശേഷത്തില്‍ വിശ്വസിക്കുവിന്‍."

എന്ന് പറഞ്ഞാണ് അവിടുന്ന് ദൈവരാജ്യ പ്രഘോഷണം ആരംഭിച്ചത്. സുവിശേഷസന്ദേശത്തിന്റെ അന്തസത്തയായ മനസാന്തരവും ദൈവകരുണയും തന്നെയാണ് യോനായുടെ അടയാളം. 

മാനസാന്തരം എന്നതിന് ബൈബിൾ ഉപയോഗിക്കുന്ന പദങ്ങൾ ഗ്രീക്കിൽ മെറ്റെനോയിയ ( Metanoia - change of mind/ heart ) എന്നും ഹീബ്രുവിൽ ഷൂബ് ( Shub - turning to God) എന്നുമാണ്. 

മനസിന്റെ നവീകരണം വഴി രൂപാന്തരപ്പെട്ട് ദൈവത്തിലേക്ക് അനുദിനം തിരിയാൻ യോനായുടെ അടയാളം സഹായിക്കട്ടെ.

✍️ അഗസ്റ്റിൻ മ്ലാവറയിൽ സി. എം. ഐ.

ഇടുങ്ങിയ വാതിൽ

🥭 *ജ്ഞാനധ്യാനം* 🥭

*2️⃣0️⃣2️⃣0️⃣ജൂലൈ1️⃣2️⃣* 

 *ഇടുങ്ങിയ വാതിൽ* 

"ഇടുങ്ങിയ വാതിലിലൂടെ പ്രവേശിക്കുവാന്‍ പരിശ്രമിക്കുവിന്‍. ഞാന്‍ നിങ്ങളോടു പറയുന്നു, അനേകംപേര്‍ പ്രവേശിക്കാന്‍ ശ്രമിക്കും. എന്നാല്‍ അവര്‍ക്കു സാധിക്കുകയില്ല."

ലൂക്കാ 13 : 24

ദൈവരാജ്യത്തിന്റെ സുവിശേഷം പ്രഘോഷിച്ച് പ്രബോധനം നൽകി പട്ടണങ്ങളിലും ഗ്രാമങ്ങളിലും പഠിപ്പിച്ചു കൊണ്ട് ഈശോ ജെറുസലേമിലേക്ക് നടന്നു നീങ്ങുന്നു. യാത്രക്കിടയിൽ ഒരാളുടെ സംശയത്തിന് ഈശോ ഉത്തരം കൊടുക്കുന്നു. 

സംശയം ഇതാണ് : "കര്‍ത്താവേ, രക്‌ഷപ്രാപിക്കുന്നവര്‍ ചുരുക്കമാണോ?" 

ചോദ്യത്തിനുള്ള ഉത്തരം നേരിട്ട് പറയാതെ രക്ഷ പ്രാപിക്കാനുള്ള വഴിയാണ് ഈശോ പറഞ്ഞ് കൊടുക്കുന്നത്. 

"ഇടുങ്ങിയ വാതിലിലൂടെ പ്രവേശിക്കുവാന്‍ പരിശ്രമിക്കുവിന്‍. ഞാന്‍ നിങ്ങളോടു പറയുന്നു, അനേകംപേര്‍ പ്രവേശിക്കാന്‍ ശ്രമിക്കും. എന്നാല്‍ അവര്‍ക്കു സാധിക്കുകയില്ല."

ഇടുങ്ങിയ വാതിലാണ് രക്ഷയിലേക്കുള്ള വഴി. 

ഇടുങ്ങിയ വാതിലിനെക്കുറിച്ച് മത്തായി സുവിശേഷകന്റെ വാക്കുകളിൽ ഈശോ വ്യക്തമാക്കുന്നത് കൂടി ചേർത്ത് വായിക്കാം. 

"ഇടുങ്ങിയ വാതിലിലൂടെ പ്രവേശിക്കുവിന്‍; വിനാശത്തിലേക്കു നയിക്കുന്ന വാതില്‍ വിസ്‌തൃതവും വഴി വിശാലവുമാണ്‌; അതിലേ കടന്നുപോകുന്നവര്‍ വളരെയാണുതാനും.

എന്നാല്‍, ജീവനിലേക്കു നയിക്കുന്ന വാതില്‍ ഇടുങ്ങിയതും വഴി വീതികുറഞ്ഞതുമാണ്‌. അതു കണ്ടെത്തുന്നവരോ ചുരുക്കം."

(മത്തായി 7 : 13-14)

എന്താണ് ഇടുങ്ങിയ വാതിൽ? 

ഇന്ദ്രിയ നിഗ്രഹം, ആത്മനിയന്ത്രണം, പ്രാർത്ഥനാ ജീവിതം, ഉപവാസം, തപസ്സ്... എല്ലാം ഇടുങ്ങിയ വാതിലാണ്. 

ഈ പ്രത്യേക സാഹചര്യത്തിൽ പ്രകൃതി സംരക്ഷണവും വ്യക്തി ശുചിത്വവും, പരിസര ശുചീകരണവും, കായികാധ്വാനവും എല്ലാം തപസ്സിന്റെ ഭാഗമാണ് എന്നതിൽ സംശയമില്ല. 

ഇടുങ്ങിയ വാതിൽ സ്വയം കണ്ടെത്തുകയും അതിലൂടെ പ്രവേശിച്ച് രക്ഷ നേടുന്നു എന്ന് ഉറപ്പ് വരുത്തുകയും ചെയ്യുകയാണ് നമ്മുടെ ധർമ്മം. 

കത്തോലിക്കാ സഭയുടെ മതബോധനഗ്രന്ഥത്തിൽ 2015 - ാം ഖണ്ഡിക ശ്രദ്ധിക്കാം. 

"പരിപൂർണ്ണതയുടെ വഴി കുരിശിന്റെ വഴിയാണ്. പരിത്യാഗവും ആത്മീയസമരവുമില്ലാതെ വിശുദ്ധീകരണമില്ല."

തന്നിഷ്ടങ്ങളുടേയും താൻപോരിമയുടെയും വിശാലവും വിസ്തൃതവുമായ വാതിലും വഴിയും ജീവിതം കൊണ്ട് സ്വയം തെരഞ്ഞെടുത്തിട്ട് മരണ ശേഷം ഇടുങ്ങിയ വാതിലിൽ കൂടി പ്രവേശിക്കാമെന്നു വിചാരിക്കുന്നത് വ്യർത്ഥമാണ് എന്ന് വേണം മനസ്സിലാക്കാൻ. 

മനസാന്തരപ്പെടാനും തിരികെ വരാനും ഇടുങ്ങിയ വാതിൽ തെരെഞ്ഞെടുക്കാനുമുള്ള അവസരം ജീവൻ ഉള്ള കാലം മാത്രമേ ഉള്ളൂ എന്നതാണ് യാഥാർഥ്യം. 

വിശാലവും വിസ്തൃതവുമായ മാർഗ്ഗങ്ങളും വാതിലുകളും തേടി നടന്നവർ കേൾക്കേണ്ടി വരുന്ന മറുപടി വേദനാജനകമാണ്. 

"വീട്ടുടമസ്‌ഥന്‍ എഴുന്നേറ്റ്‌, വാതില്‍ അടച്ചു കഴിഞ്ഞാല്‍ പിന്നെ, നിങ്ങള്‍ പുറത്തുനിന്ന്‌, കര്‍ത്താവേ, ഞങ്ങള്‍ക്കു തുറന്നുതരണമേ എന്നു പറഞ്ഞ്‌ വാതില്‍ക്കല്‍ മുട്ടാന്‍ തുടങ്ങും. അപ്പോള്‍ അവന്‍ നിങ്ങളോടു പറയും: നിങ്ങള്‍ എവിടെ നിന്നാണെന്നു ഞാന്‍ അറിയുന്നില്ല."

(ലൂക്കാ 13 : 25)

വിശാലമായ വാതിലുകളിൽ കൂടി കടന്ന് വിസ്തൃതമായ വഴികളിൽ യാത്ര ചെയ്‌തെങ്കിലും ഈശോയുടെ നാമത്തിൽ വിരുന്നുകൾ നടത്തി ഭക്ഷിക്കാനും അവന്റെ പ്രബോധനങ്ങൾ കേട്ടിരിക്കാനും സമയം കണ്ടെത്തിയതിന്റെ അവകാശവാദം പറയുമ്പോളും അവന്റെ ഉത്തരത്തിന് മാറ്റമില്ല. 

"നിങ്ങള്‍ എവിടെനിന്നാണെന്നു ഞാന്‍ അ റിയുന്നില്ല. അനീതി പ്രവര്‍ത്തിക്കുന്ന നിങ്ങള്‍ എന്നില്‍നിന്ന്‌ അകന്നു പോകുവിന്‍.

(ലൂക്കാ 13 : 27)

ഈശോയ്ക്ക് എന്നെ തിരിച്ചറിയാൻ എനിക്ക് അവിടുത്തോടുള്ള സമാനതകൾ കണ്ടെത്തേണ്ടതുണ്ട്. 

അവിടുത്തെ അടിസ്ഥാന സ്വഭാവസവിശേഷതകളായ കാരുണ്യവും കരുതലും സ്നേഹവും ജീവിതത്തിൽ സ്വാംശീകരിച്ചും പ്രാർത്ഥനയുടെയും തപസ്സിന്റെയും ആത്മനിയന്ത്രണത്തിന്റെയും ഇടുങ്ങിയ വഴിയിൽ യാത്ര ചെയ്തും അവിടുത്തെ മുൻപിൽ എത്തുമ്പോൾ അവിടുന്നെന്നെ തിരിച്ചറിയും.

✍️ അഗസ്റ്റിൻ മ്ലാവറയിൽ സി. എം. ഐ.

എന്റെ സ്വന്തമല്ല

🥭 *ജ്ഞാനധ്യാനം* 🥭

 *2️⃣0️⃣2️⃣0️⃣ജൂലൈ1️⃣1️⃣* 

 *എന്റെ സ്വന്തമല്ല* 

"ഈശോ പറഞ്ഞു: എന്‍െറ പ്രബോധനം എന്‍െറ സ്വന്തമല്ല, എന്നെ അയച്ചവന്‍േറതത്ര.

അവിടുത്തെ ഇഷ്‌ടം നിറവേറ്റാന്‍മനസ്സുള്ളവന്‍ ഈ പ്രബോധനം ദൈവത്തില്‍നിന്നുള്ളതോ അതോ ഞാന്‍ സ്വയം നല്‍കുന്നതോ എന്നു മനസ്‌സിലാക്കും."

യോഹന്നാന്‍ 7 : 16-17

തന്റെ ഭൂമിയിലെ നിലനില്പിനെക്കുറിച്ചും ജീവിതനിയോഗത്തെക്കുറിച്ചും എത്ര കൃത്യതയാണ് ഈശോയ്ക്ക്. 

പറയുന്ന വാക്കുകളുടെയും ചെയ്യുന്ന പ്രവർത്തികളുടെയും പ്രേരകശക്തിയെക്കുറിച്ചുള്ള സ്വയാവബോധം ഈശോ വ്യക്തമാക്കുന്നു. 

പിതാവായ ദൈവത്തിന്റെ വാക്കുകളും പ്രവർത്തികളും വെളിപ്പെടുത്തുക എന്ന ദൗത്യം വേർപിരിക്കാനാവാത്തവിധം തന്റെ നിലനില്പിനോട് അഭേദ്യമായി ബന്ധപ്പെട്ടതാണ് എന്ന് ഈശോയ്ക്ക് തിരിച്ചറിവുണ്ടായിരുന്നു. 

"എന്നെ അയച്ചവന്റെ ഇഷ്ടം നിറവേറ്റുന്നതും അവന്റെ ജോലി പൂർത്തിയാക്കുന്നതുമാണ് എന്റെ ഭക്ഷണം" എന്ന് പറഞ്ഞ് മറ്റൊരവസരത്തിൽ ഈശോ അത് സൂചിപ്പിച്ചിട്ടുണ്ട്. 

ഭക്ഷിക്കുക എന്ന പ്രാഥമികാവശ്യമായ ജൈവചോദനയേക്കാൾ മീതെ പിതാവിന്റെ വാക്കുകൾക്കും പ്രവർത്തികൾക്കും ഈശോ പ്രാധാന്യം കൊടുത്തു. 

പിതാവിന്റെ ഇഷ്ടം വെളിപ്പെടുത്തുന്ന പ്രബോധനങ്ങളായിരുന്നു ഈശോയുടെ പ്രവാചകധർമ്മത്തിന്റെ ആധാരശില എന്ന് നാം തിരിച്ചറിയുന്നു. 

മാമോദീസ സ്വീകരിച്ച ഓരോ വിശ്വാസിയുടെയും രാജകീയ പൗരോഹിത്യത്തിൽ ഉള്ള പങ്കാളിത്തം ഈശോയുടെ രാജത്വത്തിലും പ്രവാചകധർമ്മത്തിലും പുരോഹിതശുശ്രൂഷയിലും ഉള്ള പങ്കാളിത്തമാണ് എന്ന് തിരുസഭയെക്കുറിച്ചുള്ള രണ്ടാം വത്തിക്കാൻ കൗൺസിലിന്റെ ജനതകളുടെ പ്രകാശം എന്ന പ്രമാണരേഖ വ്യക്തമാക്കുന്നുണ്ട്. പ്രവാചകധർമ്മത്തിൽ വ്യത്യസ്തങ്ങളായ രീതികളിൽ പങ്കാളികളാകുമ്പോൾ ദൈവഹിതം വെളിപ്പെടുത്തുന്ന വാക്കുകളും പ്രവർത്തികളും നമുക്കുണ്ടോ എന്ന് കണ്ടെത്തേണ്ടതുണ്ട്. 

എന്റെ വാക്കുകളും പ്രവർത്തികളും ജീവിക്കുന്ന ദൈവത്തിന്റെ സാന്നിധ്യത്തെ വെളിപ്പെടുത്തുന്നു എന്ന് ചങ്കിൽ കൈ വച്ച് പറയാൻ ഉള്ള ആത്മബലം എന്നെങ്കിലും ഉണ്ടാകുമോ ആവോ?

✍️ അഗസ്റ്റിൻ മ്ലാവറയിൽ സി. എം. ഐ.

രക്ഷിക്കാത്ത അറിവ്

🥭 *ജ്ഞാനധ്യാനം* 🥭

 *2️⃣0️⃣2️⃣0️⃣ജൂലൈ1️⃣0️⃣* 

 *രക്ഷിക്കാത്ത അറിവ്* 

"അവര്‍ തങ്ങളുടെ അനുയായികളെ ഹേറോദേസ്‌ പക്‌ഷക്കാരോടൊത്ത്‌ അവന്‍െറ അടുത്ത്‌ അയച്ചുചോദിച്ചു: ഗുരോ, നീ സത്യവാനാണെന്നും ആരുടെയും മുഖംനോക്കാതെ നിര്‍ഭയനായി ദൈവത്തിന്‍െറ വഴി സത്യമായി പഠിപ്പിക്കുന്നുവെന്നും ഞങ്ങള്‍ അറിയുന്നു."

മത്തായി 22 : 16

എതിരാളികൾക്ക് പോലും മതിപ്പുളവാകും വിധം സത്യവാനും ആരുടെയും മുഖം നോക്കാതെ നിർഭയനായി ദൈവത്തിന്റെ വഴി സത്യമായി പഠിപ്പിക്കുന്നവനാണ് ഈശോ. 

ഈ യാഥാർഥ്യത്തെക്കുറിച്ച് ഫരിസേയർക്കും അറിവുണ്ടായിരുന്നു എന്ന് സുവിശേഷവായന വ്യക്തമാക്കുന്നു. 

പക്ഷെ അവരുടെ അറിവ് അവർക്ക് രക്ഷയ്ക്ക് കരണമായില്ല എന്നതാണ് ദുഃഖസത്യം. 

അറിവിന്റെ കുറവല്ല അവർക്ക് കെണിയാകുന്നത് എന്ന് വ്യക്തം. 

വലിയ യാഥാർഥ്യത്തെക്കുറിച്ച് കൃത്യമായ അറിവുണ്ടായിട്ടും ആ അറിവ് വ്യർത്ഥമായിപോകുന്നു എന്നുള്ളത് എത്രയോ ദുഖകരമാണ്. 

നമുക്ക് ലഭിച്ചിട്ടുള്ള ഏറ്റവും അമൂല്യമായ സമ്മാനം ഏതാണ് എന്ന ഒരു ചോദ്യം സ്വയം ചോദിച്ചാൽ അതിന് കണ്ടെത്താവുന്ന ആത്മാർത്ഥമായ ഒരേ ഒരുത്തരം എന്തായിരിക്കും? 

എന്റെ വ്യക്തിജീവിതത്തിന് ലഭിച്ചിട്ടുള്ള ഏറ്റവും അമൂല്യമായ സമ്മാനം പിതാവിന്റെ പ്രിയപുത്രനും ഏകരക്ഷകനുമായ ഈശോയും ഈശോയെക്കുറിച്ചുള്ള അറിവുമാണ് എന്ന് സംശയലേശമന്യേ നമുക്ക് ഏറ്റുപറയാനാകും. 

ഈശോയെക്കുറിച്ചുള്ള ദൈവീകസത്യങ്ങളുടെ അറിവാണ് നമ്മുടെ നമ്മുടെ ക്രിസ്തീയമായ നിലനിൽപ്പിന്റെ ആധാരം എന്നത് തർക്കമില്ലാത്ത സത്യമാണ്. 

ആ അറിവ് രക്ഷയ്ക്ക് കരണമാകുന്നവിധം വിവിധ സാഹചര്യങ്ങളിൽ ജീവിക്കാനാകുന്നുണ്ട് എന്ന് ഉറപ്പ് വരുത്തുകയാണ് നമ്മുടെ ധർമ്മം. 

ഫരിസേയരുടെ അറിവ് എന്ത് കൊണ്ട് അവർക്ക് രക്ഷയ്ക്ക് കരണമായില്ല എന്ന് കൂടി കണ്ടെത്തുമ്പോൾ ജ്ഞാനധ്യാനം അർത്ഥപൂർണ്ണമാകുന്നു. സുവിശേഷവായനയിൽ ഫരിസേയരോടുള്ള ഈശോയുടെ പ്രതികരണം ഒന്ന് ശ്രദ്ധിക്കാം. " അവരുടെ ദുഷ്‌ടത മനസ്‌സിലാക്കിക്കൊണ്ട്‌ ഈശോ പറഞ്ഞു: കപടനാട്യക്കാരേ, നിങ്ങള്‍ എന്നെ പരീക്‌ഷിക്കുന്നതെന്ത്‌? "

ദുഷ്ടതയും കപടതയും ഉള്ളിൽ വച്ച് കൊണ്ട് ദൈവാന്വേഷണത്തിൽ ഏർപ്പെടുന്നത് വിഫലമായ അധ്വാനമായി മാറും എന്ന് ഇതോർമ്മിപ്പിക്കുന്നു. 

ദുഷ്ടതയും കപടതയും ഉള്ളിലുള്ളപ്പോൾ എത്ര ഉന്നതമായ അറിവും കെണിയായി മാറുന്നു എന്നതാണ് നമുക്കുള്ള പാഠം. 

കപടതയും ദുഷ്ടതയും ഉള്ളിൽ നിന്നും എടുത്തെറിഞ്ഞു തുടങ്ങുമ്പോൾ അറിവ് അനുഭവത്തിന് വഴി മാറുന്നു.

✍️ അഗസ്റ്റിൻ മ്ലാവറയിൽ സി. എം. ഐ.

നിലവിളി

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *ജൂലൈ* 9️⃣

 *നിലവിളി* 

"നിശ്‌ശബ്‌ദനായിരിക്കുവാന്‍ പറഞ്ഞുകൊണ്ട്‌ പലരും അവനെ ശകാരിച്ചു. എന്നാല്‍, അവന്‍ കൂടുതല്‍ ഉച്ചത്തില്‍ വിളിച്ചുപറഞ്ഞു: ദാവീദിന്‍െറ പുത്രാ, എന്നില്‍ കനിയണമേ!"

മര്‍ക്കോസ്‌ 10 : 48

ഈശോ കടന്നു പോകുന്നു എന്നറിഞ്ഞപ്പോൾ അന്ധയാചകനായ ബെർതിമേയൂസ് കരഞ്ഞു നിലവിളിക്കുന്നു, "ദാവീദിന്‍െറ പുത്രനായ ഈശോയെ, എന്നില്‍ കനിയണമേ!" നിലവിളിച്ചു പ്രാർത്ഥിക്കുന്നവനെ കാണാതെ പോകാൻ ഈശോയ്ക്കാകില്ല എന്ന് സുവിശേഷം അവർത്തിച്ചുറപ്പിക്കുന്നു. 

നഷ്ടപ്പെട്ടു പോയ കാഴ്ചയാണ് ബെർത്തിമേയൂസിന്റെ സങ്കടകാരണം. 

നഷ്ടപ്പെട്ടു പോയ കാഴ്ച തിരികെ തരാൻ കഴിവുള്ളവൻ വഴിയരികിൽ കൂടി നടന്ന് നീങ്ങുന്നു എന്ന് തിരിച്ചറിയുമ്പോൾ കാഴ്ച തിരികെ കിട്ടാൻ വേണ്ടി ബെർത്തിമേയൂസ് നിലവിളിക്കുന്നു. 

മനസ്സ് മടുക്കാതെ നിലവിളിച്ചുള്ള പ്രാർത്ഥന തുടരാൻ പ്രേരകമാണ് ബെർത്തിമേയൂസിന്റെ നിലവിളി. 

"നിശ്‌ശബ്‌ദനായിരിക്കുവാന്‍ പറഞ്ഞുകൊണ്ട്‌ പലരും അവനെ ശകാരിച്ചു. എന്നാല്‍, അവന്‍ കൂടുതല്‍ ഉച്ചത്തില്‍ വിളിച്ചുപറഞ്ഞു: ദാവീദിന്‍െറ പുത്രാ, എന്നില്‍ കനിയണമേ!"

കണ്ണിലെ വെട്ടം കെട്ടുപോയവന്റെ ദുഃഖം ജനക്കൂട്ടത്തിനറിയില്ലല്ലോ. 

ആരൊക്കെ നിശ്ശബ്ദരായിരിക്കാൻ പറഞ്ഞാലും ഒരു ശകാരത്തിനും തടയാനാവാത്ത വിധം അവന്റെ പ്രാർത്ഥനയുടെ ശബ്ദം ഉയർന്നു തന്നെ നിന്നു. 

നിശ്ശബ്ദരാക്കാൻ ശ്രമിക്കുന്നവരുടെ മുന്നിൽ ഉച്ചത്തിൽ നിലവിളിച്ചു പ്രാർത്ഥിച്ച് ബെർത്തിമേയൂസ് കർത്താവിന്റെ കരുണ നേടിയെടുത്തു. 

ദൈവവിശ്വസികളുടെ നിലവിളിക്കുന്ന പ്രാർത്ഥന കാണുന്ന ജനക്കൂട്ടം പുറത്താക്രോശിക്കുന്നുണ്ട്.

നിശ്ശബ്ദരാക്കാൻ ആണ് ശ്രമം. 

പക്ഷെ, നിലവിളിച്ചു പ്രാർത്ഥിച്ചു കർത്താവിന്റെ കരുണ നേടിയെടുക്കുന്ന ആരുടെയൊക്കെയോ സുകൃതം എല്ലാ ആക്രോശങ്ങളെയും കീഴടക്കുന്നു. 

നിലവിളിച്ചുള്ള പ്രാര്ഥനയെക്കുറിച്ച് ധ്യാനിക്കുമ്പോൾ ഈശോയും നിലവിളിച്ചു പ്രാർത്ഥിച്ചിരുന്നു എന്ന് ഓർമ്മിച്ച് പ്രാർത്ഥന തുടരാം. 

"തന്‍െറ ഐഹികജീവിതകാലത്ത്‌ ക്രിസ്‌തു, മരണത്തില്‍നിന്നു തന്നെ രക്‌ഷിക്കാന്‍ കഴിവുള്ളവന്‌ കണ്ണീരോടും വലിയ വിലാപത്തോടുംകൂടെ പ്രാര്‍ഥനകളുംയാചനകളും സമര്‍പ്പിച്ചു. അവന്‍െറ ദൈവഭയംമൂലം അവന്‍െറ പ്രാര്‍ഥന കേട്ടു."

ഹെബ്രായര്‍ 5 : 7

✍️ അഗസ്റ്റിൻ മ്ലാവറയിൽ സി. എം. ഐ.