🥭 *ജ്ഞാനധ്യാനം* 🥭
2️⃣0️⃣2️⃣0️⃣ *ജൂൺ*0️⃣5️⃣ 0️
*വചനശുശ്രൂഷയിലെ രോഗശാന്തി*
"ഈശോ പറഞ്ഞു: നിങ്ങള്‍ കാണുകയും കേള്‍ക്കുകയും ചെയ്‌തതെല്ലാം ചെന്ന്‌ യോഹന്നാനെ അറിയിക്കുക. കുരുടന്‍മാര്‍ കാണുന്നു; മുടന്തന്‍മാര്‍ നടക്കുന്നു; കുഷ്‌ഠരോഗികള്‍ സുഖപ്പെടുന്നു; ചെകിടര്‍ കേള്‍ക്കുന്നു; മരിച്ചവര്‍ ഉയിര്‍പ്പിക്കപ്പെടുന്നു; ദരിദ്രരോടു സുവിശേഷം പ്രസംഗിക്കപ്പെടുന്നു."
ലൂക്കാ 7 : 22
'വരാനിരിക്കുന്ന മിശിഹാ നീ തന്നെയോ?' എന്ന് ഈശോയോട് ചോദിക്കാൻ പറഞ്ഞ് സ്നാപകയോഹന്നാൻ തന്റെ ശിഷ്യരെ ഈശോയുടെ പക്കലേക്ക് അയക്കുന്നു...
സ്നാപകനാണോ ശിഷ്യർക്കാണോ ഈ സംശയം ഉണ്ടായത് എന്ന് വ്യകതമല്ല...
സ്നാപകന്റെ സംശയം തന്റെ ശിഷ്യർ വഴി ഈശോയെ അറിയിക്കുന്നതാകാം...
അല്ലെങ്കിൽ, ശിഷ്യരുടെ സംശയം മാറ്റാൻ അവരെ ഈശോയുടെ പക്കലേക്ക് സ്നാപകൻ പറഞ്ഞ് വിടുന്നതും ആകാം...
അതിന്റെ വിശദാംശങ്ങളെക്കാൾ ഈശോയുടെ മറുപടി ആണ് നമ്മുടെ ധ്യാനവിചാരം...
"ഈശോ പറഞ്ഞു: നിങ്ങള്‍ കാണുകയും കേള്‍ക്കുകയും ചെയ്‌തതെല്ലാം ചെന്ന്‌ യോഹന്നാനെ അറിയിക്കുക. കുരുടന്‍മാര്‍ കാണുന്നു; മുടന്തന്‍മാര്‍ നടക്കുന്നു; കുഷ്‌ഠരോഗികള്‍ സുഖപ്പെടുന്നു; ചെകിടര്‍ കേള്‍ക്കുന്നു; മരിച്ചവര്‍ ഉയിര്‍പ്പിക്കപ്പെടുന്നു; ദരിദ്രരോടു സുവിശേഷം പ്രസംഗിക്കപ്പെടുന്നു."
ലൂക്കാ 7 : 22
ഈശോയുടെ ജീവിതനിയോഗവും ദൗത്യവും ഭൂമിയിൽ ദൈവരാജ്യം സ്ഥാപിക്കുക എന്നതായിരുന്നു...
ഈശോയുടെ പ്രഥമവും പ്രധാനവുമായ ദൗത്യമായ ദൈവാരാജ്യസ്ഥാപനത്തിന്റെ സവിശേഷമായ അടയാളങ്ങൾ അഞ്ച് തലങ്ങളിൽ ഉണ്ട് എന്നത് ആർക്കും നിഷേധിക്കാനാവാത്ത ദൈവശാസ്ത്ര വ്യാഖ്യാനം ആണ്...
1. രോഗികളെ സുഖപ്പെടുത്തി
2. പിശാചുക്കളെ ബഹിഷ്കരിച്ചു
3. പ്രപഞ്ചശക്തികളുടെമേൽ അധികാരം തെളിയിച്ചു
4. മരിച്ചവരെ ഉയിർപ്പിച്ചു
5. പാപങ്ങൾ മോചിച്ചു
മുകളിൽ പ്രസ്താവിച്ച അഞ്ച് കാര്യങ്ങൾ ഈശോയുടെ ദൈവരാജ്യവേലയുടെ സവിശേഷമായ അടയാളങ്ങളാണ് എന്ന സത്യത്തിൽ സുവിശേഷം വായിക്കുന്ന ആർക്കും എതിരഭിപ്രായം ഉണ്ടാവില്ല...
ഈശോയുടെ ദൗത്യം ഈ ഭൂമിയിൽ തുടരേണ്ടതും രക്ഷയുടെ അടയാളമായി നില കൊള്ളേണ്ടതും തിരുസഭയാണ് എന്ന് ജനതകളുടെ പ്രകാശം എന്ന രണ്ടാം വത്തിക്കാൻ കൗൺസിൽ പ്രമാണരേഖ രേഖപ്പെടുത്തുന്നു...
പൗരോഹിത്യത്തെക്കുറിച്ചുള്ള വത്തിക്കാൻ കൗൺസിൽ ഡിക്രി (Presbyterorum Ordinis) രണ്ടാം അധ്യായം മുഴുവൻ പരാമർശിക്കുന്നത് പുരോഹിതരുടെ മൂന്ന് ദൗത്യങ്ങളെക്കുറിച്ച് ആണ്...
a. സുവിശേഷം പ്രഘോഷിക്കുക
b. കൂദാശകൾ പരികർമ്മം ചെയ്യുക
c. ദൈവജനത്തെ ആത്മീയമായി രൂപപ്പെടുത്തുക
തിരുസഭയുടെ പൗരോഹിത്യത്തെക്കുറിച്ചുള്ള ഔദ്യോഗിക പഠനങ്ങളിൽ പുരോഹിതന് ഈ മൂന്ന് ദൗത്യങ്ങൾ മാത്രമേ ഉള്ളൂ...
ഈശോയുടെ ദൈവരാജ്യസംസ്ഥാപന ദൗത്യത്തിൽ ശുശ്രൂഷപൗരോഹിത്യം വഴി പങ്ക് ചേരുന്നവരുടെ പരമവും പ്രധാനവുമായ ദൗത്യം സുവിശേഷ പ്രഘോഷണവും പ്രബോധനവും ആണ് എന്നതിൽ എതിരഭിപ്രായമുണ്ടാവുകയില്ല...
താരതമ്യേന ദീർഘമായ ഈ ആമുഖം ഒരു യാഥാർഥ്യത്തെക്കുറിച്ച് പരാമർശിക്കാൻ ആണ്....
ഈശോ തന്റെ ദൈവരാജ്യസംസ്ഥാപനത്തിന്റെ അടയാളങ്ങൾ ഇന്നും തിരുസഭയിലെ വചനശുശ്രൂഷകളിൽ കൂടി തുടരുന്നു എന്ന യാഥാർഥ്യം...
തിരുസഭയിലെ വചനശുശ്രൂഷയിൽ നടക്കുന്ന അടയാളങ്ങളെക്കുറിച്ചും അത്ഭുതങ്ങളെക്കുറിച്ചും അത്ര നല്ലതല്ലാത്ത ഭാഷയിൽ പരിഹാസരൂപേണ അവതരിപ്പിച്ച ഒരു "കത്തനാരുടെ" തന്നെ പ്രഭാഷണം സഭാവിരോധികൾ എല്ലാവരും കൂടി ചേർന്ന് വൈറൽ ആക്കി തന്നിട്ട് അധികം നാളായില്ല...
തിരുസഭാധ്യക്ഷൻമാർ അംഗീകരിച്ച വചനശുശ്രുഷകളിൽ നടക്കുന്ന അത്ഭുതങ്ങളും അടയാളങ്ങളും രോഗശാന്തിയും തട്ടിപ്പാണ് എന്ന് വിളിച്ചു പറയുന്നതിൽ വലിയ അജ്ഞത ഉണ്ട് എന്ന് മുകളിൽ പ്രസ്താവിച്ച സഭാപ്രബോധനങ്ങൾ തന്നെ വ്യക്തമാക്കും...
വചനശുശ്രൂഷയിൽ നടക്കുന്ന രോഗശാന്തിയും അത്ഭുതങ്ങളും അടയാളങ്ങളും സംഭവിക്കാൻ പാടില്ലാത്ത മഹാ അപരാധമായി ചിത്രീകരിക്കാൻ അസാമാന്യ തൊലിക്കട്ടി വേണം !
വചനശുശ്രൂഷയിൽ രക്ഷകനായ ഈശോയുടെ നാമത്തിൽ രോഗശാന്തികളും അത്ഭുതങ്ങളും നടക്കുന്നതിനെ പരിഹസിക്കാൻ കാരണം അജ്ഞത ആണ് എന്ന് താഴെവിശദീകരിക്കുന്ന കാര്യങ്ങൾ വ്യക്തമാക്കും...
ജീവിതത്തിൽ ഒരുപാട് പ്രതിസന്ധികളും സഹനങ്ങളും രോഗങ്ങളും ഇല്ലാത്തപ്പോൾ വചനശുശ്രൂഷയിലെ അത്ഭുതങ്ങളെക്കുറിച്ച് പരിഹസിക്കുമ്പോൾ കേൾക്കാൻ നല്ല രസമായിരിക്കും...
നമുക്കോ നമ്മുടെ പ്രിയപ്പെട്ടവർക്കോ എന്തെങ്കിലും ഒരു രോഗമോ വേദനയോ വരട്ടെ...
പരിഹസിക്കുന്നവർ പോലും പ്രാർത്ഥിച്ചു പോകും... രോഗസൗഖ്യത്തിനു വേണ്ടി !
പ്രാർത്ഥിക്കുമ്പോൾ രോഗസൗഖ്യങ്ങൾ സംഭവിക്കുന്നതും അത്ഭുതങ്ങൾ സംഭവിക്കുന്നതിനെയും അധിക്ഷേപിക്കുന്ന തരത്തിലും എല്ലാം തട്ടിപ്പാണ് എന്നത് പോലെയും അവതരിപ്പിക്കുന്നതിൽ തെറ്റുകൾ ഉണ്ട് എന്നാണ് പഠിച്ചിട്ടുള്ള സഭാപ്രബോധനങ്ങളുടെ വെളിച്ചത്തിൽ എന്റെ വ്യക്തിപരമായ അഭിപ്രായം...
സുവിശേഷങ്ങളിൽ ഈശോ ചെയ്തതായി 37 അത്ഭുതങ്ങൾ അടയാളപ്പെടുത്തിയിട്ടുണ്ട്...
അപ്പസ്തോലപ്രവർത്തനങ്ങളിൽ ശിഷ്യന്മാർ വഴി ഈശോ പ്രവർത്തിച്ച 16 അത്ഭുതങ്ങൾ അടയാളപ്പെടുത്തിയിട്ടുണ്ട്...
കത്തോലിക്കാസഭയിൽ ഒരാളെ വിശുദ്ധനായി / വിശുദ്ധയായി പ്രഖ്യാപിക്കുന്നതിന് മുമ്പ് കുറഞ്ഞത് മൂന്ന് അത്ഭുതങ്ങൾ ആ വ്യക്തിയുടെ മധ്യസ്ഥതയിൽ നടന്നിരിക്കുന്നു എന്ന് തെളിയപ്പെടേണ്ടതുണ്ട്...
"അവര്‍ എല്ലായിടത്തും പോയി പ്രസംഗിച്ചു. കര്‍ത്താവ്‌ അവരോടുകൂടെ പ്രവര്‍ത്തിക്കുകയും അടയാളങ്ങള്‍കൊണ്ടു വചനം സ്‌ഥിരീകരിക്കുകയും ചെയ്‌തിരുന്നു."
മര്‍ക്കോസ്‌ 16 : 20
ഈ വചനം സഭയുടെ ദൈവവചനശുശ്രൂഷകളിൽ ഇന്നും പൂർത്തിയാകുന്നുണ്ട്...
സിറോ മലബാർ സഭയുടെ പട്ടം നൽകൽ ശുശ്രൂഷയുടെ ഏറ്റവും പ്രധാന കൈവെപ്പ് പ്രാർത്ഥനയിൽ മെത്രാൻ വൈദികവിദ്യാർത്ഥിക്ക് വേണ്ടി പ്രാർത്ഥിക്കുന്ന പ്രധാനകാര്യം " രോഗികളുടെ മേൽ കൈകൾ വച്ച് അവരെ സുഖപ്പെടുത്താൻ ഉള്ള കൃപ" ആണ്...
ആ കൃപയിൽ ശരണപെട്ടു പ്രാർത്ഥിക്കുമ്പോൾ രോഗങ്ങൾക്ക് സൗഖ്യം കിട്ടുന്നതിനെ അധിക്ഷേപിക്കുന്നതിനെ സുവിശേഷം വായിച്ചവർക്കോ സഭയുടെ പ്രബോധനങ്ങൾ അറിഞ്ഞവർക്കോ പൗരോഹിത്യത്തിന്റെ ദൗത്യം മനസിലാക്കിയവർക്കോ ഒരിക്കലും അംഗീകരിക്കാൻ ആവില്ല...
ഇനി പറയൂ...
തിരുസഭയുടെ വചനശുശ്രൂഷകളിൽ ഈശോയുടെ ദൈവരാജ്യസംസ്ഥാപനത്തിന്റെ അടയാളങ്ങളായ രോഗസൗഖ്യം നടക്കുന്നത് അങ്ങനെ അങ്ങ് പരിഹസിക്കേണ്ട കാര്യമാണോ?
തൽക്കാലം സുവിശേഷവും സഭാപ്രബോധബങ്ങളും പട്ടം നൽകൽ ശുശ്രൂഷയിലെ പ്രാർത്ഥനകളും ഒക്കെ വിശ്വസിക്കാൻ ആണിഷ്ടം...
ഇനി ആരെങ്കിലും ദൈവവചനശുശ്രൂഷയെ സ്വാർത്ഥലാഭത്തിനു വേണ്ടി ഉപയോഗിച്ചാൽ അവരുടെ തെറ്റിന് ഈശോ മറുപടി കൊടുക്കട്ടെ...
സത്യസന്ധമായി നിർവഹിക്കപ്പെടുന്ന ദൈവവചനശുശ്രൂഷകൾ ദൈവമഹത്വത്തിനായി ഇനിയും വളരട്ടെ...
ദൈവത്തിന് മഹത്വം കൊടുക്കാനും ദൈവവചന പ്രഘോഷണം വഴി ഈശോയുടെ ദൈവാരാജ്യവേല തിരുസഭയോട് ചേർന്ന് നിന്ന് തുടരാൻ ഉള്ള വിനയം വചനപ്രഘോഷകർക്കും ധ്യാനകേന്ദ്രങ്ങൾക്കും ലഭിക്കട്ടെ !
രോഗസൗഖ്യങ്ങൾ വഴിയും പിശാചുക്കളുടെ ബഹിഷ്കരണം വഴിയും തിരുസഭയുടെ കൂദാശകളിലൂടെയും വചന ശുശ്രൂഷകളിലൂടെയും ദൈവരാജ്യ വേല തുടരാൻ ബലഹീനനായ പുരോഹിതരെ തെരഞ്ഞെടുത്ത ഏക രക്ഷകനായ കർത്താവീശോമിശിഹായ്ക്ക് എന്നും മഹത്വമുണ്ടാകട്ടെ....
✍️ അഗസ്റ്റിൻ മ്ലാവറയിൽ സി. എം. ഐ.
