കരുണ

🥭 *ജ്ഞാനധ്യാനം* 🥭

2️⃣0️⃣2️⃣0️⃣ *മെയ്‌* 3️⃣0️⃣

"ഞാന്‍ നിന്നോടു കരുണ കാണിച്ചതുപോലെ നീയും നിന്‍െറ സഹസേവകനോടു കരുണ കാണിക്കേണ്ടതായിരുന്നില്ലേ?"

മത്തായി 18 : 33

 *കരുണ* 

തെറ്റ് ചെയ്യുന്ന സഹോദരനോട് "എത്ര പ്രാവശ്യം ക്ഷമിക്കണം? ഏഴു പ്രാവശ്യമോ? " എന്ന പത്രോസിന്റെ ചോദ്യത്തിന് ഉത്തരമായി "ഏഴെന്നല്ല, ഏഴ് എഴുപത് പ്രാവശ്യം" എന്ന് മറുപടി പറഞ്ഞ ശേഷം ഈശോ പറയുന്ന ഉപമയാണ് നിർദ്ദയനായ ഭൃത്യന്റെ ഉപമ... 

നിർദയനായ ഭൃത്യന്റെ ഉപമയിൽ മൂന്ന് പേരെ പരിചയപ്പെടുന്നു... 

യജമാനനായ രാജാവ്, അയാളുടെ ഒരു സേവകൻ, മറ്റൊരു സഹസേവകൻ... 

സേവകൻ യജമാനനോട് 10000 താലന്ത് കടപ്പെട്ടിരുന്നു...

സേവകന് അത് വീട്ടിതീർക്കാൻ നിര്വാഹമില്ലാതിരുന്നത് കൊണ്ട് യജമാനൻ മനസ്സലിഞ്ഞു കടം ഇളച്ചു കൊടുത്തു... 

10000 താലന്ത് കടപ്പെട്ടിരുന്നവനോട്‌ യജമാനൻ വലിയ കരുണ കാണിച്ചതാണ്‌ എന്ന കാര്യമേ അയാൾ മറന്നു എന്ന മട്ടിലാണ് കാര്യങ്ങളുടെ പോക്ക്... 

10000 താലന്തിന്റെ കടമൊക്കെ ഇളച്ചു കിട്ടിയതിന്റെ ആഹ്ലാദത്തിൽ പുറത്തിറങ്ങിയപ്പോൾ തന്നോട് 100 ദനാറാ കടപ്പെട്ട ഒരു സഹസേവകനെ കാണുന്നു.... 

100 ദനാറാ മാത്രം കടപ്പെട്ട പാവം സഹസേവകൻ കരഞ്ഞു കേണപേക്ഷിച്ചിട്ടും 10000 താലന്ത് ഇളച്ചു കിട്ടിയവനിൽ കരുണ ലവലേശം മുള പൊട്ടുന്നില്ല എന്നതാണ് യാഥാർഥ്യം... 

ഇനി ഒരു താരതമ്യം ആകാം നമുക്ക്... 

10000 താലന്ത് കടപ്പെട്ട സേവകനും 100 ദനാറാ കടപ്പെട്ട സഹസേവകനും തമ്മിൽ ഒരു താരതമ്യം... 

10000 ഉം 100 ഉം തമ്മിൽ ഒരു താരതമ്യം.... 

താലന്തും ദനാറായും തമ്മിൽ ഒരു താരതമ്യം... 

രണ്ട് പേരും മറ്റാരോടോ കടപ്പെട്ടവർ ആണ് എന്നതാണ് ഇവർക്കിടയിലെ സമാനത... 

ഇനി ഇവർക്കിടയിലെ വ്യത്യാസം നോക്കാം... 

അത്, 100 ഉം 10000 ഉം തമ്മിൽ ഉള്ള വ്യത്യാസം ആണ്... 

താലന്തും ദനാറായും തമ്മിൽ ഉള്ള വ്യത്യാസം ആണ്...

100 ഉം 10000 ഉം തമ്മിൽ ഉള്ള വ്യത്യാസം 100 നോട്‌ 100 ഗുണിച്ചാലേ 10000 ആവുകയുള്ളൂ... 

നോക്കണേ...10000 ഇളച്ചു കിട്ടിയിട്ട് അതിന്റെ 100 ൽ ഒന്ന് മാത്രം കടപ്പെട്ട ഒരു സഹസേവകസനോട് കരുണ കാണിക്കാൻ കഴിയാതെ പോയ ഒരു സേവകന്റെ ക്രൂരത !

ഇനി താലന്തും ദനാറായും തമ്മിൽ ഉള്ള വ്യത്യാസം അതിലും കാണാം... 

ഒരു താലന്ത് ഏതാണ്ട് 34.2 kg വരും എന്നാണ് കണക്ക്... അത് വെള്ളിയോ സ്വർണ്ണമോ ആകാം...

ഒരു ദനാറാ 3.5 മുതൽ 5 വരെ ഗ്രാം ആണ്... 

അങ്ങനെ ആകുമ്പോൾ 10000 താലന്ത് 342000 kg ക്ക് സമം ആണ്... 

(10000 talent = 342000 kg) 

100 ദനാറാ അങ്ങേയറ്റം 500 ഗ്രാം ആകാം... 

(100 dhanarius = 500 gm)

342000 kg ഇളച്ചു കിട്ടിയവന് 500 gm ഇളച്ചു കൊടുക്കാൻ പറ്റാത്ത വിധം ക്രൂരൻ ആകാൻ പറ്റുമോ?  

പറ്റും എന്ന് ഉപമയിലെ സേവകൻ തെളിയിക്കുന്നു... 

ഒരു വ്യത്യാസം കൂടി... 

ഒരാളുടെ ഒരു ദിവസത്തെ കൂലി ആണ് 1 ദനാറ...

ഒരു വർഷം ഒരാളുടെ സമ്പാദ്യം 300 ദനാറാ എന്നാണ് ഏകദേശ കണക്ക്... 

1 താലന്ത് 6000 ദനാറാക്ക് സമമാണ്... 

( 1 talent = 6000 dhanarius ) 

ഒരു താലന്തിന് വേണ്ടി ഒരാൾ ജോലി ചെയ്യേണ്ട കാലയളവ് നീണ്ട 20 വർഷങ്ങൾ ആണ്...

10000 താലന്ത് കടപ്പെട്ടവൻ അത് വീട്ടി തീർക്കേണ്ടിയിരുന്നു എങ്കിൽ, യജമാനൻ കരുണ കാണിച്ചില്ലായിരുന്നു എങ്കിൽ 20 × 10000 = 200000 വർഷങ്ങൾ ജോലി ചെയ്തു വീട്ടാൻ മാത്രം കടം ഉണ്ടായിരുന്നു...

അതാകട്ടെ അസാധ്യമായ ഒരു കാര്യവും.... 

അപ്പോൾ അവന് കിട്ടിയ കരുണയുടെ ആഴം എന്തു മാത്രം ആണ് എന്ന് അചിന്തനീയമാണ്...  

100 ദനാറാ കടപ്പെട്ടവന് അത് 4 മാസം കൊണ്ട് ജോലി ചെയ്തു തീർക്കാവുന്നതേ ഉള്ളായിരുന്നു... 

അപ്പോൾ മറ്റൊരു കാര്യം കൂടി മനസിലാക്കാം... 

20000 വർഷങ്ങൾ ജോലി ചെയ്തു തീർക്കാൻ മാത്രം കടം ഉണ്ടായിരുന്നവന് 4 മാസം ജോലി ചെയ്താൽ തീരുന്ന കടം ഉള്ളവനോട് ക്ഷമിക്കാൻ പറ്റുന്നില്ല എന്നതാണ് ഉപമയിലെ ഏറ്റവും സവിശേഷമായ വൈരുധ്യം!

എല്ലാം കുമ്പസാരക്കൂട്ടിലേക്ക് വിരൽ ചൂണ്ടുന്നുണ്ട്... 

ആരോടും പറയാനാഗ്രഹിക്കാത്ത പാപത്തിന്റെ വിഴുപ്പുഭാണ്ഡം കുമ്പസാരക്കൂട്ടിൽ ഇറക്കി വച്ച് ദൈവകരുണ ആവോളം സ്വീകരിച്ചിട്ട് കൂടെ ഉള്ളവരുടെ നിസ്സാരകുറവുകൾ ക്ഷമിക്കാതെ ഇരിക്കുമ്പോൾ ഞാനും 10000 ഇളച്ചു കിട്ടിയ സഹസേവകനെ പോലെ ക്രൂരനാകുന്നു !

ജീവിതം കുറച്ച് കൂടി കരുണാർദ്രമാക്കാം... 

സ്വീകരിക്കുന്ന ദൈവകരുണയുടെ ആഴമാറിയാത്തത് കൊണ്ടല്ലേ പലപ്പോഴും ക്രൂരമായ നിലപാടുകളിലേക്ക് ജീവിതം വഴുതി പോകുന്നത്?

✍️ അഗസ്റ്റിൻ മ്ലാവറയിൽ സി. എം. ഐ.