തിരസ്‌ക്കരിക്കപ്പെട്ട അത്തിവൃക്ഷം

ജ്ഞാനധ്യാനം

2020 സെപ്റ്റംബർ 23

തിരസ്‌ക്കരിക്കപ്പെട്ട അത്തിവൃക്ഷം

"വിശ്വാസത്തോടെ പ്രാര്‍ഥിക്കുന്നതെല്ലാം നിങ്ങള്‍ക്കു ലഭിക്കും."

മത്തായി 21 : 22 

ഫലം നല്കാത്ത അത്തിവൃക്ഷത്തെ ഈശോ ശപിക്കുന്നതാണ് വചന വായനയുടെ പശ്ചാത്തലം... 

വായനയുടെ തലക്കെട്ട് പോലും അങ്ങനെയാണ്... 

അനുഗ്രഹിക്കാൻ മാത്രം ഭൂമിയിൽ അവതരിച്ചവൻ എന്തേ ശപിക്കുന്നതിന്റെ ശരീരഭാഷ സ്വീകരിക്കുന്നു? 

ഇളക്കൊഴുപ്പ് കാണിച്ച് ആകർഷിക്കുകയും അടുത്തെത്തുമ്പോൾ ഫലം ഇല്ലാതിരിക്കുകയും ചെയ്യുന്ന അപകടകരമായ കപടതയുടെ അവസ്ഥയായിരുന്നു അത്തിവൃക്ഷത്തിന്റേത്...

പുറം മോടികളിൽ അഭിരമിക്കുകയും ആത്മീയതയെ പ്രകടനങ്ങളിൽ ഒതുക്കുകയും ചെയ്യാൻ ശ്രമിക്കുമ്പോൾ ഞാനും അത്തിവൃക്ഷത്തിന്റെ അവസ്ഥയിൽ ആണ്... ഹൃദയം പരിശോധിക്കുന്ന ദൈവത്തിന്റെ മുമ്പിൽ സ്വീകാര്യത നേടാൻ സാധിക്കുമോ എന്നതാണ് ഉത്തരം കണ്ടെത്തേണ്ട ചോദ്യം... 

"മനുഷ്യന്‍ കാണുന്നതല്ല കര്‍ത്താവ്‌ കാണുന്നത്‌. മനുഷ്യന്‍ ബാഹ്യരൂപത്തില്‍ ശ്രദ്‌ധിക്കുന്നു; കര്‍ത്താവാകട്ടെ ഹൃദയഭാവത്തിലും."

1 സാമുവല്‍ 16 : 7

കപടത വച്ച് പുലർത്തിയാൽ ദൈവസന്നിധിയിൽ നിന്നും തിരസ്ക്കരിക്കപ്പെടും എന്നതാണ് ജ്ഞാനധ്യാനത്തിലെ തിരിച്ചറിവ്... 

✍️ അഗസ്റ്റിൻ മ്ലാവറയിൽ സി. എം. ഐ.

ഭയപ്പെടുവിൻ

ജ്ഞാനധ്യാനം

2020 സെപ്റ്റംബർ 22

ഭയപ്പെടുവിൻ

"ശരീരത്തെ കൊല്ലുകയും ആത്‌മാവിനെ കൊല്ലാന്‍ കഴിവില്ലാതിരിക്കുകയും ചെയ്യുന്നവരെ നിങ്ങള്‍ ഭയപ്പെടേണ്ടാ, മറിച്ച്‌, ആത്‌മാവിനെയും ശരീരത്തെയും നരകത്തിനിരയാക്കാന്‍ കഴിയുന്നവനെ ഭയപ്പെടുവിന്‍."

മത്തായി 10 : 28 

എഴുതപ്പെട്ട ദൈവവചനം നൽകുന്ന ഏറ്റവും പ്രതീക്ഷാനിർഭരമയെ സന്ദേശം "ഭയപ്പെടേണ്ട " എന്നതാണ്... 

ഏതാണ്ട് മുന്നൂറ്റി അറുപത്തഞ്ച് പ്രാവശ്യം ഇതാവർത്തിക്കപ്പെടുന്നുണ്ട്... 

ഒരു പ്രതിസന്ധിയിലും ഭയപ്പെടേണ്ട എന്ന് ആശ്വസിപ്പിക്കുന്നവൻ തന്നെ ചിലതിനെ ഭയപ്പെടാനും പറഞ്ഞിട്ടുണ്ട് എന്നതാണ് നമ്മുടെ ജ്ഞാനധ്യാനം... 

ശരീരത്തേയെയും ആത്മാവിനെയും നരകത്തിനിരയാക്കാൻ കഴിയുന്ന സാത്താനെ ഭയപ്പെടണം എന്ന് തന്നെയാണ് ഈശോ ഉദ്ദേശിക്കുന്നത് എന്ന് വ്യക്തം.... 

ജീവിതത്തിലെ അനുദിനവ്യാപാരങ്ങൾ ആത്മനാശത്തിന് കാരണമാകുന്നതാണോ അല്ലയോ എന്ന് കണ്ടെത്താനുള്ള വിവേചനാശക്തിയാണ് ഇന്ന് പരിശുദ്ധത്മാവിനോട് പ്രാർത്ഥിക്കുന്നത്... 

ജീവിതം ഒരു ആത്മീയ സമരം ആണ്... 

പൗലോസ് ശ്ലീഹ അത് വ്യക്തമായി അവതരിപ്പിക്കുന്നുണ്ട്... 

"സാത്താന്‍െറ കുടിലതന്ത്രങ്ങളെ എതിര്‍ത്തുനില്‍ക്കാന്‍ ദൈവത്തിന്‍െറ എല്ലാ ആയുധങ്ങളും ധരിക്കുവിന്‍.

...

രക്‌ഷയുടെ പടത്തൊപ്പി അണിയുകയും ദൈവവചനമാകുന്ന ആത്‌മാവിന്‍െറ വാള്‍ എടുക്കുകയും ചെയ്യുവിന്‍."

എഫേസോസ്‌ 6 : 10-17

✍️ അഗസ്റ്റിൻ മ്ലാവറയിൽ സി. എം. ഐ.

പാപികളുടെ സ്നേഹിതൻ

ജ്ഞാനധ്യാനം

2020 സെപ്റ്റംബർ 21

പാപികളുടെ സ്നേഹിതൻ

"ഇതുകേട്ട്‌ ഈശോ പറഞ്ഞു: ആരോഗ്യമുള്ളവര്‍ക്കല്ല, രോഗികള്‍ക്കാണ്‌ വൈദ്യനെക്കൊണ്ട്‌ ആവശ്യം."

മത്തായി 9 : 12 

ഈശോയിൽ കുറ്റം കണ്ടു പിടിക്കാൻ നിരന്തര പരിശ്രമം നടത്തിയിരുന്ന ഫരിസേയരുടെ ഒരു ആരോപണം അവിടുന്ന് ചുങ്കക്കാരുടെയും പാപികളുടെയും സ്നേഹിതൻ ആണ് എന്നതായിരുന്നു... 

ചുങ്കക്കാരെയും കുറവുള്ളവരെയും വിധിച്ചു തള്ളി അകറ്റി നിർത്തിയിരുന്ന സ്വയം ന്യായീകരണത്തിന്റെയും മഹത്വവൽക്കരണത്തിന്റെയും വഴികളിൽ നീങ്ങിയിരുന്ന ഫരിസയർക്ക് ചുങ്കക്കാരുടെയും പാപികളുടെയും അരികിൽ ഭക്ഷണത്തിനിരുന്ന ഈശോയെ മനസിലാക്കാൻ സാധിച്ചില്ല... 

കുറവുള്ളവരെ ചേർത്ത് നിർത്തുന്നതും മുറിവുള്ളവരെ സുഖപ്പെടുത്തുന്നതുമായ കരുണാർദ്രമായ ശുശ്രൂഷയാണ് അവിടുത്തെത് എന്ന് ഈശോ വ്യക്തമാക്കുന്നു... 

എന്റെ കുറവുകൾ ദൈവത്തിന്റെ തെരഞ്ഞെടുപ്പിന് തടസമല്ല എന്നാണ് ജ്ഞാനധ്യാനത്തിലെ തിരിച്ചറിവ്... 

കുറവുകളെ സദാപരിഹരിക്കുന്ന ഈശോയെ വിളിച്ചു പ്രാർത്ഥിച്ചാണ് വൈദികശ്രേഷ്ഠൻ വൈദികർത്ഥികളെ പൗരോഹിത്യത്തിലേക്ക് പ്രവേശിപ്പിക്കുന്നത്... 

ഒരു ഓർമ്മപ്പെടുത്തലായി ചങ്കിലുണ്ടത്...

കുറവുകളെ സദാ പരിഹരിക്കുന്ന  ഈശോയുടെ കരുണ മാത്രമാണ് എന്റെ തെരെഞ്ഞെടുപ്പിന്റെ ആധാരം എന്ന് ഓരോ ദിവസവും കൂടുതൽ തിരിച്ചറിവുണ്ടാകുന്നു... 

✍️ അഗസ്റ്റിൻ മ്ലാവറയിൽ സി. എം. ഐ.

അനുതാപം

ജ്ഞാനധ്യാനം

2020 സെപ്റ്റംബർ 19

അനുതാപം

"അതുപോലെ തന്നെ, അനുതാപം ആവശ്യമില്ലാത്ത തൊണ്ണൂറ്റൊന്‍പതു നീതിമാന്‍മാരെക്കുറിച്ച്‌ എന്നതിനെക്കാള്‍ അനുതപിക്കുന്ന ഒരു പാപിയെക്കുറിച്ച്‌ സ്വര്‍ഗത്തില്‍ കൂടുതല്‍ സന്തോഷമുണ്ടാകും എന്ന്‌ ഞാന്‍ നിങ്ങളോടു പറയുന്നു."

ലൂക്കാ 15 : 7

ലൂക്കായുടെ സുവിശേഷം പതിനഞ്ചാം അധ്യായം മുഴുവൻ മടങ്ങി വരവിന്റെ ഉപമകളാണ്... 

നഷ്ടപ്പെട്ട ആടിനെ കണ്ടു കിട്ടുമ്പോൾ ഇടയനുണ്ടാകുന്ന സന്തോഷം പോലെ നഷ്ടപ്പെട്ട മക്കൾ തിരികെ വരുമ്പോൾ പിതാവായ ദൈവം സന്തോഷിക്കുന്നു... 

എന്റെ അനുതാപം സ്വർഗ്ഗത്തിൽ  സന്തോഷം ജനിപ്പിക്കുന്നു എന്ന സത്യം ഒരു തിരിച്ചറിവാണ്... 

ജീവിതത്തിന്റെ സമഗ്രത കളഞ്ഞ് പോകാൻ ഇടയുള്ള സകല വഴികളിൽ നിന്നും ഒരു തിരിഞ്ഞു നടത്തം ജീവിതം ആവശ്യപ്പെടുന്നുണ്ട്... 

തന്നിഷ്ടങ്ങളുടെ മുൾക്കാടുകളിൽ കൊമ്പുടക്കികിടക്കുന്ന കുഞ്ഞാടിന്റെ അവസ്ഥ എന്റെ ആത്മീയ ജീവിതത്തിന്റെ നടുചേദം തന്നെയാണ്... 

ദൈവം ആഗ്രഹിക്കാത്തതും സ്വയം കണ്ടെത്തുന്നതുമായ ചില ഇഷ്ടങ്ങളുടെ കൂർത്തമുള്ളുകൾക്കിടയിൽ വേദനകൾ ഏറ്റു വാങ്ങുമ്പോൾ ആണ് തിരിച്ചറിവ് ഉണ്ടാകുന്നത്... 

ആരും രക്ഷിക്കാനില്ലാത്തതും സ്വയം രക്ഷപെടാനില്ലാത്തതുമായ മുൾക്കാടുകളിൽ കുടുങ്ങി കിടന്ന് നിലവിളിക്കുമ്പോൾ എന്നെ തേടി യഥാർത്ഥ രക്ഷകൻ വരും... 

സാക്ഷാൽ ഈശോ മിശിഹാ... 

പിന്നെ ജീവിതം അവിടുത്തെ കരങ്ങളിൽ ഭദ്രം.... 

✍️ അഗസ്റ്റിൻ മ്ലാവറയിൽ സി. എം. ഐ.

അശുദ്ധത്മാക്കളെ അകറ്റുന്നവൻ

ജ്ഞാനധ്യാനം

2020 സെപ്റ്റംബർ 18

അശുദ്ധത്മാക്കളെ അകറ്റുന്നവൻ

"എല്ലാവരും അദ്‌ഭുതപ്പെട്ട്‌ പരസ്‌പരം പറഞ്ഞു: എന്തൊരു വചനമാണിത്‌! ഇവന്‍ അധികാരത്തോടും ശക്‌തിയോടും കൂടെ അശുദ്‌ധാത്‌മാക്കളോടു കല്‍പിക്കുകയും അവ വിട്ടു പോവുകയും ചെയ്യുന്നുവല്ലോ."

ലൂക്കാ 4 : 36

ദൈവരാജ്യത്തിന്റെ ആഗമനം ഈശോ പ്രാഘോഷിച്ചപ്പോൾ അവ അവിടുന്ന് പ്രകടമാക്കിയത് അടയാളങ്ങളിലൂടെയാണ്... 

സുവിശേഷങ്ങളിൽ കാണുന്ന അടയാളങ്ങൾ പ്രധാനമായും അഞ്ചാണ്... 

1. രോഗികളെ സൗഖ്യപ്പെടുത്തുക 

2. പ്രപഞ്ചശക്തികളുടെ മേൽ അധികാരം തെളിയിക്കുക 

3. മരിച്ചവരെ ഉയിർപ്പിക്കുക 

4. പിശാചുക്കളെ ബഹിഷ്കരിക്കുക 

5. പാപങ്ങൾ മോചിക്കുക 

മനുഷ്യജീവിതത്തിന്റെ സമഗ്രതയ്ക്ക് കൂച്ചുവിലങ്ങിടുന്ന ദുഷ്ടശക്തികളെ തോൽപ്പിക്കുന്ന ഈശോ കൂടെയുള്ളപ്പോൾ ഭയമരുത് എന്നാണ് ഇന്നത്തെ ജ്ഞാനധ്യാനം... 

ആവർത്തിച്ചുരുവിടാനും ഓർമ്മിച്ചുവയ്ക്കാനും ഒരു വചനം കൂടി ചേർത്ത് വായിക്കാം... 

"സമാധാനത്തിന്‍െറ ദൈവം ഉടന്‍തന്നെ പിശാചിനെ നിങ്ങളുടെ കാല്‍ക്കീഴിലാക്കി തകര്‍ത്തുകളയും. നമ്മുടെ കര്‍ത്താവായ യേശുക്രിസ്‌തുവിന്‍െറ കൃപ നിങ്ങളോടുകൂടെ ഉണ്ടായിരിക്കട്ടെ!"

റോമാ 16 : 20

ഈശോകൂടെയുണ്ട് എന്ന ഉറപ്പുണ്ടായിട്ടും അവിടുത്തെ സാനിധ്യം കൂടെയുണ്ടെങ്കിൽ ഒരു ദുഷ്ടശക്തിയും നമ്മെ ഉപദ്രവിക്കില്ല എന്ന അറിവുണ്ടായിട്ടും അറിഞ്ഞോ അറിയാതെയോ  ഉള്ളിൽ ഭയം സൂക്ഷിക്കാൻ പ്രേരിപ്പിക്കുന്ന അപകടകരമായ ആത്മീയ ശൈലികളിൽ നിന്ന് സ്വയം പുറത്ത് കടക്കാനാണ് ശ്രമം... 

"കുഞ്ഞുമക്കളേ, നിങ്ങള്‍ ദൈവത്തില്‍ നിന്നുള്ളവ രാണ്‌. നിങ്ങള്‍ വ്യാജപ്രവാചകന്‍മാരെ കീഴ്‌പ്പെടുത്തിയിരിക്കുന്നു. എന്തെന്നാല്‍, നിങ്ങളുടെ ഉള്ളിലുള്ളവന്‍ ലോകത്തിലുള്ളവനെക്കാള്‍ വലിയവനാണ്‌."

1 യോഹന്നാന്‍ 4 : 4

✍️ അഗസ്റ്റിൻ മ്ലാവറയിൽ സി. എം. ഐ.

വിധി

ജ്ഞാനധ്യാനം

2020 സെപ്റ്റംബർ 17

വിധി

"അവന്‍ മറുപടി പറയും: സത്യമായി ഞാന്‍ നിങ്ങളോടു പറയുന്നു, ഈ ഏറ്റവും എളിയവരില്‍ ഒരുവന്‌ നിങ്ങള്‍ ഇതു ചെയ്യാതിരുന്നപ്പോള്‍ എനിക്കു തന്നെയാണു ചെയ്യാതിരുന്നത്‌."

മത്തായി 25 : 45

ജീവിതത്തിന്റെ കണക്ക് കൊടുക്കാൻ നിത്യവിധിയാളനായ ഈശോയുടെ മുമ്പിൽ നിൽക്കേണ്ടി വരുന്ന അന്ത്യവിധി ദിനത്തെക്കുറിച്ച് ജ്ഞാനധ്യാനം ഓർമ്മിപ്പിക്കുന്നു...

വേദനിക്കുന്ന മനുഷ്യരുടെ സങ്കടങ്ങൾക്ക് മുമ്പിൽ ഒരാൾ എടുക്കുന്ന നിലപാടുകൾ അയാളുടെ അന്ത്യവിധിയുമായി അഭേദ്യമായി ബന്ധപ്പെട്ടിരിക്കുന്നു... 

ഒരർത്ഥത്തിൽ നമ്മുടെ അവസാനത്തെ പരീക്ഷയുടെ ചോദ്യപേപ്പർ പുറത്തായിട്ട് എത്രയോ വർഷങ്ങൾ കഴിഞ്ഞു... 

വിശക്കുന്നവന് ആഹാരം കൊടുത്തും ദഹിക്കുന്നവന് കുടിക്കാൻ കൊടുത്തും ഒക്കെ കരുണാർദ്രമായ ജീവിതം കൊണ്ട് ഉത്തരം കൊടുത്ത് പൂരിപ്പിക്കേണ്ട ഒരു ചോദ്യപേപ്പർ ഉണ്ട് നമുക്ക്... 

കാരുണ്യം നിറഞ്ഞ നിലപാടുകൾ സ്വർഗ്ഗത്തിലേക്കുള്ള യാത്ര എളുപ്പമുള്ളതാക്കുന്നു... 

കാരുണ്യം വറ്റിയ നിലപാടുകൾ സ്വർഗ്ഗരാജ്യത്തിൽ നിന്ന് അകറ്റുകയും ചെയ്യുന്നു... 

✍️ അഗസ്റ്റിൻ മ്ലാവറയിൽ സി. എം. ഐ.

വചനശക്തി

ജ്ഞാനധ്യാനം

സെപ്റ്റംബർ 16

വചനശക്തി

ആകാശവും ഭൂമിയും കടന്നുപോകും; എന്നാല്‍, എന്‍െറ വചനങ്ങള്‍ കടന്നുപോവുകയില്ല."

മത്തായി 24 : 35 

നിലനിൽക്കുന്ന ഒരു ജീവിതം ലക്ഷ്യമാക്കിയുള്ള യാത്രയിലാണ് നാം... 

തെരെഞ്ഞെടുക്കപ്പെട്ടവരെ എല്ലാറ്റിന്റെയും സ്രഷ്ടാവും പരിപാലകനുമായ ദൈവം തന്റെ പുത്രൻ വഴി ഒരുമിച്ചു കൂട്ടുന്ന ദിവസത്തിൽ പേരെണ്ണപ്പെടും വിധം ജീവിക്കാൻ ശ്രമിക്കണം എന്ന് ഓർമ്മിപ്പിക്കുന്നതാണ് ഇന്നത്തെ ജ്ഞാനധ്യാനം... 

അധികം നിലനിൽപ്പില്ലാത്തതും ക്ഷയിച്ചു പോകുന്നതുമായ ഈ ലോകത്തെ നിരാകരിക്കാതെ തന്നെ നിലനിൽക്കുന്നവയെ ധ്യാനിക്കണം... 

തന്റെ പ്രിയപുത്രനെ ദൈവം അയച്ചു വിശുദ്ധീകരിച്ച ഈ ലോകത്തെ അക്ഷയമായ സ്വർഗ്ഗരാജ്യത്തിലേക്കുള്ള യാത്രയുടെ ഇടമായി കാണാം...

ഇവിടെ ആയിരിക്കുമ്പോളും സ്ഥിരം ആയിരിക്കേണ്ടേ ഇടം ഇതല്ല എന്ന് നിർബന്ധബുദ്ധിയോടെ സ്വയം ഓർമ്മിപ്പിക്കാം... 

നിലനിൽക്കുന്നവയെ മുന്നിൽ കണ്ടുള്ള പ്രയാണത്തിൽ കരുത്താകുന്ന മറ്റമില്ലാത്ത ദൈവവചനം ഉള്ളിൽ നിറക്കേണ്ടത് അനിവാര്യമാണ്... 

ദൈവവചനമായ ഈശോയെ, ക്ഷയിച്ചു പോകാത്ത സ്വർഗ്ഗരാജ്യത്തിലേക്കുള്ള യാത്രയിൽ അവിടുത്തെ വചനം അയച്ചു വഴി കാട്ടണമേ... 

✍️ അഗസ്റ്റിൻ മ്ലാവറയിൽ സി. എം. ഐ.